Meta chuan WhatsApp hmangtute tan privacy feature an update thar a, midang hriat lohin a rukin group a chhuahsan theih dawn ta! Group chat bakah hian online status entu pawh a control thei tawh dawn a, screenshot pawh a block thei tawh dawn nia tarlan a ni. 

Meta chief executive Mark Zuckerberg chuan feature thar hian WhatsApp hmanga inbiakna chu him zawkin a siam dawn a, hmaichhana inbia ang maia him a ni thei dawn niin a tarlang. Feature thar hi tun thla chhung hian peihhman beisei a ni a, update thar a awm thuai mai thei. 

Midang hmaizah vangin emaw chhan dang vang pawh nise WhatsApp group chhuahsan hreh takin i lo awm tawh thin em, tunah chuan ning chung chunga awm ve reng lo khan midang hriat lem lohin i chhuahsan keuh thei tawh dawn. Group member dangte hmuh lohin group administrator hriatpuiin i chhuak thei tawh dawn e. 

Product head Ami Vora chuan WhatsApp hi inbikna atana him berah an chhuah theih an beisei tih a sawi a, social media-ah chuan security tha ber zinga mi a ni dawn a, message, media, voice message, video call leh chat back-up te chu him viau tawh turah an ngai tih a sawi.