ZALEN, April 15, 2025: Thawhtanni zan khan US atanga Mizorama zin mipa chu a thlenna hotel atangin a tla hlum.

Kum 50 mi, Vàn Uk Chung hi Texas atanga Mizorama zin niin Emerald Hotel, Tuikual South-a a thlenna chhawng thumna atangin zan dar 11:30 vel khan a hnuai kawngpuiah tlain a thi a ni.

He chetsualna chungchangah hian Zalen chuan Aizawl PS biain case I/O chuan rinhlelh tur a awm lova, vanduai chetsualna a nih thu an sawi.

Police hnen atanga thudawn danin Van Uk Cung hi US khua leh tui nihna nei tawh niin April thla tir lama a pa lungphun hmang tura lokal a ni a, Lawngtlai lama lungphun a hman zawh hnuah Aizawlah lokirin vawiin hi USA pan tura New Delhi lama a thlawh thlak ni tur a ni.