Scientist-te chuan India-a Covid-19 thawh hnihna leng mek chu chhiarkawp hmanga an chawh hnuah April thla laihawlah hian a vanglai a thleng dawn niin an sawi a, May thla tawp atangin a ziaawm tan dawn niin an chhut chhuak.

Thawh hmasa zawkah khan chhiarkawp hmanga an chawhna, SUTRA an tih chuan August atanga darh zau tanin September-ah a vanglai a thleng ang a, February, 2021 atangin a ziaawm dawn tih an chawk chhuak a, a dik thawkhat hle.

Indian Institute of Technology (IIT) Kanpur-a mi, a chawk chhuaktu scientist rual zinga tel, Manindra Agrawal chuan, “Ni eng emaw zat liam taa kan dinhmun atanga kan chhutin India-ah hian April 15-20 inkar velah hri leng vanglai hi a thleng thei dawn niin kan chhut a. A pung chak ang bawkin a tlakhniam lam pawh a chak hle turah kan ngai a, May thla tawpah chuan mak takin a tlahniam nghal duak ang,” a ti.

Scientist-te hian a vanglai thleng hmasa ber tur chu Punjab an nih theih thu leh ni reilo teah an tawng mai thei nia an ngaih thu an sawi a, a dawtah Maharashtra ni turin an chhut chhuak.

A hranna chhuttu scientist rual dangte pawhin hri leng mek hian April thla laihawl leh May thla laihawl inkar vela a vanglai tak tak a thleng dawn niin an chhut chhuak ve bawk.