Bayern Munich atanga £42.5million zeta an lei chhuah Robert Lewandowski chuan Barcelona lama a team-mate te chu Florida-ah a hmu. Polish striker Lewandowski chuan a thian te leh an club president Joan Laporta a hmu tel bawk a ni.

Kum 33 a upa hian Bayern tana a khelh chhungin match 375 a khelhah goal 344 zet a khung a, Nou Camp lamah a chhunzawm thei dawn em tih zawmna awm mek chu season tan hunah chauh a hriat ang. Lewandowski chuan Spain lamah champion nomawi chawi tura a kal thu a sawi bawk.

'A tawp a tawpah chuan Barcelona player ka ni thei ta hi ka lawm hle a ni' tia bul tanin Lewandowski chuan,"Ni reilo liam ta kha ka tan chuan hun rei tak a ni. Tunah chuan thil zawng zawng tihfel a ni tawh a, ka nunah bung thar ka kai dawn bakah chona thar ka hmachhawn dawn ta a ni," a ti. 

Sawi zawmin,"La Liga lamah hian ka khelh chakna a rei tawh a, club lian ber a khelh hi ka duhna a rei tawh. Tunah chuan bung thar kaiin chona thar hmachhawn tur ka hmaah chhawp chhuah a ni ta. Chak ngei duh mi ka nih angin tunhma ang khan ka la ngai reng a, game-ah chauh ni lo, title lak ngei ka duh thin. Season tir atangin tha taka kan khelh ka duh a, season tawp-a trophy chawi ngei ka duh a ni," a ti. 

Lewandowski hian United States lama an tour neih naah Barcelona tana a debut game chu MLS team Inter Miami lakah a khel thei dawn a, chumi zawh lamah Las Vegas lamah an hmelma hlun Real Madrid nen July ni 23 ah an in hmachhawn leh bawk ang. Ruahman lawk dan chuan Juventus nen July ni 26 khian Dallas-ah an inhmachhawn ang a, New York Red Bulls nen July ni 30-ah an inkhel leh dawn bawk a ni.