Aam Aadmi Party chuan Punjab assembly inthlana an chaka sorkar an siam a nih chuan chhiar thar lak leh tuna awm sa tihsan an tum lo tih an sawi.

AAP national convenor leh Delhi Chief Minister Arvind Kejriwal chuan thla thara inthlang tur, Punjab mipuite tan Inrinni khan an party-in thil 10 an tiamte a puang.

Jalandhar-a thuthar lakhawmtute hmaa Kejriwal-a’n an party thil tiamte a puannaah hian AAP state president leh chief minister atana an vawrh chhuah, Bhagwant Mann chuan a tawiawm a. A hmain Kejriwal-a hian sumdawng leh industry neitute a kawm bawk.

Kejriwal-a chuan an party chuan intiamna tam tak neiin an lo tihpuitlin thin hlawm avangin khawpui liana chengte pawhin an ngaihven a, tun tum inthlan atan pawh an intiamna chu an zawt hlawm niin a sawi.

Khawpui liante tihfai pawh Kejriwal-a hian a tiam a, heng zingah hian Ludhiana, Bathinda, Amritsar leh Jalandhar pawh a tel a. “AAP hi kan tling a nih chuan thil tihthianghlimna lam - bawlhhlawh paih dan mumal, tui luanna tha leh a dang bunin khawpui a lang mawi lehzual ang,” a ti.

Delhi-a ro an rel meknaah sorkar pisaa thawkte chu a tulah mi inah kalin thil an buaipui thin tih a sawi a. hei hian miin sorkar pisa dawra an kual an kual a ngaih loh phah a, helpline number an siamah an be mai thei bawk tih a sawi.

Delhi sorkara thawktute chu mi inah kalin lehkha pawimawh leh ul dang zawng zawng chu chawlhkar khat a\anga ni 10 inkarah an lamsak mai tih sawiin, “Hetiang hi Punjab-ah pawh kan kalpui ang,” a ti.