Aizawl: MPCC chuan R Day hla atanga’ Abide with me’ paih a ni chu ngaithiam loin MNF ina BJP a thawhpui thei chu mak an tih thu an sawi.

Nimina thuchhuah an siamah MPCC chuan MNF thawhpui, Hindu lal ram din tumtu BJP kaihhruai sawrkar laipui chuan India Republic Day lawmnaa sipai band ten an tum thin, Kristian hla tha tak 'Abide With Me (Ka Lalpa duhtak min awmpui ang che)' tih chu hnawlin kum 2020 atang hian 'Vande Mataram' in thlak a ni dawn niin an sawi a. Kristian hla tha tak hi India hnam pa Mahatma Gandhi hla duh berte zinga mi a nih avangin Delhi khawpuia Republic Day lawmnaah sipai chi thum Army, Navy leh Airforce brass band-ten kum 1950 atangin an tum thin niin an sawi.

MPCC chuan BJP-in Hindu lal ram din an tumna kal zelah kum tam tak Muslim leh Hindu sakhaw zuitu ten an inchuh buai thin Ayodhia hmunah Hindu temple dinna tur an tifel tawh a, Hindu sakhaw zuitute India rama a tam thei ang ber lakluh an tumna hmanrua Citizenship (Amendment) Act, 2019 an kaltlangpui tawh bawk a. Hei bakah hian India rama sakhaw hrang hrang leh hnam hrang hrangte kalphung thlak danglam a, Hindu kalphung mila khai khawm an tumna Uniform Civil Code (UCC) kalpui an tum leh mek niin an sawi a. MNF in Hindu lal ram din tumna CAB thlenga an thlawp hi a mak an ti tawp thei lo niin an thuchhuah ah an tarlang bawk.