Afghan mipuite tan sum pe chhuak dawn ta

Admin - Dec 12, 2021

Afghan mipuite tan sum pe chhuak dawn ta

Ram hrang hrang atanga Afghanistan hnena UN food & health services kaltlanga puihna tur $ maktaduai 280 hren chu pek chhuah a ni dawn ta tih World Bank chuan a sawi.

August thlaa Taliban-in thuneihna an chan hnuah Afghanistan-ah hian mipui an retheiin ei bar dinhmunah chhiatna nasa tak an tawk a. Taliban chet dan duh loh avang hian ram pawn atanga puitu tam takin an puihna an titawp rih.

World Food Programme (WFP) chuan mi nuai nga chuang chu ei tur tlachhamin an awm dawn tih a sawi a. Naupang maktaduai thum velin ei tur khamkhawp an hmu dawn lo tih a sawi bawk.

Heti taka an dinhmun a chhiat chhan hi nasa taka khua a khen vang a ni a, hei hian wheat an thar tur tam tak tichhiain a man a san phah a. Taliban chet dan avanga lungawi lo khawthlang ramten an puihna an titawp zui bawk a ni.

Khawthlang rama thiltithei tak takte chuan Taliban sorkar hi an pawm thei lo va. United States leh ram dangte chuan Afghan-te tana an sum dah, $ tld 10 zet chu an pe chhuak duh lo va, World Bank leh International Monetary Fund pawhin puihna lut thin angte a titawp bawk.

WFP chuan thlasik lo thleng mekah hian ram dang atanga puihna an dawn thina innghat mi maktaduai 23 vel chu an tam dawn niin a sawi a, ‘khawvela mihring inngaihsak lohna lian ber’ a ni thei dawn tih a sawi.

Hetiang a nih mek lai hian World Bank-in a enkawlna hnuaia awm, Afghanistan Reconstruction Trust Fund chuan UN hnuaia mi, WFP leh Unicef-ah sum a pe chhuak ve ve leh dawn tih puan a ni ta a ni.

World Bank chuan Unicef hian damdawi lama hman atan $ maktaduai 100 dawngin WFP hnenah hian $ maktaduai 180 pek a ni bawk.

Share now