Sergio Aguero chuan tun hnai khan Manchester City tana a khelhpui thin Phil Foden chu a kum rualpuiah English player tha ber a nih thu leh Pep Guardiola pawhin khelhna hun tam zawk pe se a duh thu a sawi chhuak. Aguero-a thusawi hi pawmin Pep chuan kum 21 mi Foden hi nizana Liverpool an hmachhawnnaah Premier League champion Manchester City tan bul a tan tir nghal. 

Aguero chuan City lama a team-mate hlui lakah hian beiseina sang tak a neih thu leh talent ropui tak a neih thu a tarlang. Aguero chuan,"Ka player duh tak Foden hian Atletico nena an inkhelh tum pawh khan game a thlak danglam hneh em em a, eng nge thleng dawn chu ka hre chiahlo naa, Pep hian mual chhunga hun tam zawk hmang turin chhawr se ka duh a ni," a ti. 

Sawi zawmin,"Phil Foden hian talent danglam tak a nei a, Champions League game-a Kevin De Bruyne tih goal tur a siam sak te kha, mi naran tih theih loh a ni. An generation-ah chuan a ni aia talent nei tha English player zingah an awm lo. Quality tha chungchuang a nei a, kum 21 lek upa a nih hi theihnghilh palh mai a awl zawk thin. Tun aia sanga invawrh turin inzir belhna hun tha a la ngah hle bawk," a ti.