May 10, 2024; Mizoram sorkarin Extreme sports lak luh a remti a, kumin Favang chhovah Aizawlah Thirsakawr intlansiak Red Bull Urban Down Hill Race neih a ni dawn.

Niminah Red Bull Field Marketing Manager Giridhar Narsaria chuan a office-a Thirsakawr intlansiak an kalpui dan tur leh a kaihhnawih hrilh fiaha a hmuh angin, Chief Minister Lalduhoma chuan an thil tum chu tha a tihpui mai bakah a theih ang angin Mizoram sawrkarin thawhpui a inhuam tih a hrilh a ni.

Narsaria chuan Asia khawmualpuia a hmasa ber turin kumin Favang chhovah Aizawl chhuahlam mual remchangah Red Bull Urban Down Hill Race buatsaih an tum tih a sawi a, Aizawlah Urban Down Hill Race tih theihna hmun tha tak tak a awm a, Mizoramin hmunhma tha tak a neihte chu khawvel hmuha phochhuahna remchang a nih tur thu sawiin, Mizoram chu Adventure Sports neihna hmun tha leh khualzin tana tlawh chakawm a nihzia phochhuah theih a inbeisei a, chu chu adventure sports huaihawt an tum chhan ber niin a thupui atan 'Aizawl Tlang Ruam' tih a ni ang, a ti.

Hmun chhuk chho, rem lo leh chep, hlauhawm tak takah Thirsakawrin an tlan dawn a, an tlankawnga an hman tur kawngpui thenkhat chu midang kal theih loha kharsak a ngai dawn a, venhimtu leh damdawi lam buaipuitu ngaihtuahsak an ngaih dawn bawk avangin puihna an mamawh a, a hranpain sawrkar tan thil dangah sum leh pai senna tur a awm dawn lo a ni.