Aizawl June 26, 2023 : Vawiin Mizo Hnam Run chhung inkhawmah MNF Adviser & Minister of State Robert Romawia Royte chuan a bial vawn lai Aizawl East II tlanchhiat san anga an sawina chu a chhang a, “Aizawl East-II ka tlanchhiat san lova, MNF Candidate tan ka rochun zawk a ni,” a ti.

Aizawl East-II bial chu a tlanchhiat san loh thu leh a hnunga MNF candidate tan a rochun zawk tih sawiin, “Kan nomination committee ten MNF candidate tur uluk takin an rawn thlang ang tih ka ring a. East-II bialah hian hneh takin a tling ang tih ka ring,” a ti.

Robert Romawia chuan a dinna tur Hachhek bial mipuiten ramri leh hard area-a awm an nih avangin, ruling party bialtu neih an chak ve tawh, a ti. "Aizawl East-II ai chuan bial a hahthlak dawn tih pawh ka hria a, mahse vuivaiah ka la lo. Politics-a ka luh hian khawi bialah pawh ding turin ka inpeihsa hrim hrim a ni," a ti.

Zin report pein, high level committee on internally displaced person chuan raltlante a ngaihsak tih a sawi a. Delhi-ah home secretary a hmuh thu leh CM-in chhawmdawl a rawtna an pawm tih a sawi a. “Manipur buaina chhuah ni atanga vawiin thlengin kan sawrkar hmalakna hi ropui ka ti a. Kan Chief Minister inpekna a ropuiin, home deptt officialte an fakawm hle,” a ti bawk.
“MNF chuan kan Manifesto (2018) No. 1-ah Zofate rorelna pakhat hnuaia awmkhawm turin hmalak a ni ang tiin kan dah a. Anmahni kuangkuaha va hnaih turin zo kutpuite kan buatsaih a. State pawn bakah Tahan leh Maryland thlengin zofate insuihkhawm nan budgetah pawisa kan dah a, covid avangin kan tihhlawhtling thei ta lo a ni,” a ti.

Eptu party chungchangah RRR-a chuan: “ZPM unaute hi nomination committee an thu a, an danpui an bawhchhe nghal. Bel keh phuarkhawm theih loh, lungawi lo thlemtu committee an tia, a thlemtute pawh an lungawi chuang lo. Han kehdarh lo chi an ni lo. MLA ding tur an thlan danah social media follower ngahte a nia. Tunah hian ZPM lam chu an beidawng tan a. Party pariata awm lawr tawh hi Chief Minister atan thlantlin an la awm lo,” a ti. 

Congress sorkar sawiin: “Mizoramah lapse pui (mega lapse) vawi hnih a thleng tawh a. Financial management-ah expenditure management a pawimawh ang bawkin income management a pawimawh. Kum 10 sorkar tawh leh tun term sorkar income hi intam hleih tak a ni. Neihsa tlemte renchem aiin source dik tak atanga thawhchhuah tam a pawimawh zawk. A inren pun theih loh a, income capacity tihsan a ngai,” a ti.