Aizawl June 25, 2023 : MNF Media & Publicity department leh MPCC Media department te chuan vawiin khan Aizawl Press Club-ah Press Conference an ko ve ve a, MNF lamin Chief Minister Zoramthanga chu Khawvel huap pawhin hruaitu tha leh rintlak an ti a, hetihlai hian Congress chuan Zoramthanga kaihhruai MNF partty chu thutiam langsar ti hlawhtling thei lovah an puh.

Press Conference ko hmasa zawk, MNF Media & Publicity a General Secretary VL Krosshnehzova chuan, “Mi thenkhatin hnathawk mang lo, engmah ti lo ang hialah he sawrkar hi an chhuah fo a. Chief Minister Zoramthanga kaihhruaina hnuaiah hian hripui rapthlak tak leng leh harsatna hrang hrangin min tlakbuak karah hmasawnna hna a thawk mek zel a ni,” tiin, MNF chu mahni thiltih that puan chhuah leh infak lam uar lo tak, mipuite tana ngawi renga hnathawk mawlh mawlh mai thin niin a sawi.

MPCC Media department Chairman Dr. Lalianchhunga chuan, “December 15, 2018 atanga MNF sawrkar thar a pian atangin kum ngana kan hmang mek a. Inthlan nan thla nga emaw chauh a awm tawh laiin an thutiam tihhlawhtlin loh pali an nei a ni,” a ti a. An tihhlawhtlin loh a sawite chu MNF president-in sawrkar hunah vai buhfai an rin tawh loh tur thu leh Mizo buh an rin zawk tawh tur thu a sawi te, traffic jam awm lohna khawpui, kawng chhawng, SEDP-ah nuai 3 sem te an ni tih a sawi.

MNF GS chuan Aizawl Bypass Road leh Bamboo Link Road atana hmalak a nih dan a sawi. 2000 tira Peace Bonus Rs 182.50 crs Non Plan head-a Finance Ministry atanga CM Zoramthanga’n a sawichhuak tiin, mak an ti thu a sawi bawk. SASCI Part I 2023 - 2024 hnuaiah Chief Minister ngennain, Union Finance Secretary chuan cheng nuai 20,000 Mizoram pek belh a nih tur thu Robert Romawia Royte Minister hnenah a sawi niin a sawi bawk.

Congress Spokesperson Dr. Maliana chuan, “MNF sawrkar chhungin zeldin thu leh insawi hlim chawpin hun an hmang tluan a. Mipui tan hamthatna leh hmasawnna awm si lovin an duhsakte nen rem leh rem lo pawh thlu lovin an chawm a, an hawp bawk. Ram mipui an zahna leh an pawisak lohzia thlir hian Mizoramin anmahni avanga harsatna kan tawh zel lohna tur leh kan ram, kan hnam, kan sakhua a him zel nan central-a BJP sawrkar thawhpuitu, MNF hi hnawl turin Mizoram mipui kan ngen," a ti.