Aizawl; Covid-19 vanga kum khat khar tawh Aizawl Zoological Park-ah ramsa 178 a awm mek a, chung ramsate ei tur lei nan thla khatah (February 2021) khan Rs. 3,89,737 sen a ni. Aizawl Zoologica Park-ah hian Assam State Zoo atanga lak Sakei (Tiger) a nu leh a pa dah thar a ni dawn.

Deputy Conservator of Forest (Wildlife) Lalnunzira (IFS) hnen atanga ZALEN thudawn danin, kum 2019-20 chhung khan Aizawl Zoological Park tlawhtu mi 27,269 an awm a, Revenue (Entry fee/Parking fee/Camera fee) Rs. 5,08,710 hmuh a ni. Kumin March thleng khan ramsa chi hrang 29 (Ramsa awm zawng zawng 178) awmin, an ei tur leina atan December 2020 khan Rs. 4,77,165, January 2021-ah Rs. 4,60,894 sen a ni.

Central Zoo Authority (CZA) phalna a Nandankanan Zoological Park atanga lak, Arawn (Common Peafowl) 4 chu tunhnai ah Septicemia vangin an thi a, CZA phalna in Assam State Zoo atangin Sakei lakluh tum mek niin, kumin June thla velah lak thlen theih beisei a ni.     

Sahuan enkawl na sum hi CZA funding niin tunhnai kum 4 chhung vel fund hmuh a awm lo a, tunhnai ah CZA atangin Rs. 18,30,000 hmuh niin, zawng inthlahpun dan tur zirna tur a ni.