ZALEN November 15, 2024 : Aizawl Traffic Police te chuan vawiin khan Aizawl SP Office bul tualzawlah kumin chhunga Silencer ri bengchheng an man 176 te chu PWD Roadroller hmangin an chil chhia.

Heng silencer an man te hi lirthei ke pahnih nei te, an ri pekchhuah phal sak chin tawk 80 decibels aia ring pechhuak te an ni a, vawiina tihchhiat te hi kumin chhunga an man te an ni.

Traffic Police te chuan phalna an neih angin heng silencer hmang lirtheiin ri a pekchhuah aia ring pechhuak te hi an vai thin a, an thil man te hi Court-ah tihchhiatsak phalna an hmuh hnuah tihchhiat niin, heng an thil tihchhiat te hi thir chhia ang an hralh leh dawn a, an hralhna pawisa an hmuhte hi sawrkar sumbawma thehluh leh a ni ang.