Aizawl: MNF President Zoramthanga chuan, "AMC inthlanah hian Pathianin mal min sawm leh ngei ka ring a ni," a ti.

Nimin zing khan AMC Election Ward XIV Campaign hawnna Ramliana Ralte In, Khatla ah neih a ni a, he huna thu sawitu MNF President Zoramthanga chuan, "MP, Local Council leh Village Council, Lai District Council inthlanah chakna kan chang a. Inthlan kalchhoah Pathianin mal min sawm nasa hle a, AMC inthlanah pawh hian Pathianin mal min sawm leh ngei ka ring a ni. State-a nghet taka sawrkar, term chanve pawh la hmang lo, khawvar hnua inthlang tur kan ni a, kan tlin ngei kan ring," a ti.

MNF President chuan rinawm leh dik taka campaign turin MNF mipuite a chah a. "MNF Party hian hun harsa tak tak kan tawk thin a, chuti chung chuan Pathianin Diamond Jubilee lawm thei hial turin min hruai a. He ram hi Lalpa tana buatsaih a, a rawngbawl turte chherchhuak turin Pathian leh kan ram tan, kan tih tlatna hi kan felna leh kan tlinnaah Pathianin min ruat sak a. Hun harsaah pawh Pathianin min hruai zel a ni," a ti. MLA atanga Lalduhoma ban anih chungchang sawiin, "Speaker-in Pu Duha a Disqualified hi an huat vang, an ti a. Huat vanga inbantir ngawt theih a ni lo. Dan a bawhchhiat avangin a ni an ban zawk ni," a ti a.

Anti Defection Law chu Lalduhoma telna Parliament-ah pass a nih thu leh amah chu a bawhchhe hmasa ber a ni tih a sawi a. "Tun tuma bantir a nih dawn hian Independent MLA a nih tumahin an hre tawh lo. Intihchhiat hi a tha love, tiin rei tak kan en aa, a duh duhin a tal a, ZPM ber ang ziazangin a awmzui a, ZPM President awm lai ngei pawhin ZPM office-ah ngei mithar a lawmlut a. A ni ta em em lovin kan naute'n an hria a ni. 'Min ban chuan Court-ah ka kal ang,' a ti a, a kal leh ta chuang bawk si lo. Thil reng rengah hian takna a awm tur a ni, nghet lo hian malsawmna tak tak an dawng thei lo a ni," a ti bawk.