Aizawl November 16, 2022 : Aizawl Mayor Lalrinenga Sailo chuan, "AMC-in property tax hmangin Aizawl mipui an rawk mek ti a thudiklo tih than in a awm mek niin a lang a, hetiang a thudik lo tak mai thehdarh a ni leh a thalo zawnga mipui rilru kaihruai thei thil a thleng hi Aizawl Municipal Corporation chuan pawi a ti tak zet a ni," a ti.

Aizawl Mayor chuan, "Kumin record a a lan danin Aizawl khawpuiaah hian (building) 45000 a ding a, survey zinga 60% in Rs. 500/- emaw a aia tlem emaw an chawi a, 12% in Rs. 500/- atanga Rs. 1,000/- inkar an chawi a. 22% te hian Rs. 1,000/- atanga Rs. 5,000/- inkar an chawi a, a dang 6% te hian Rs. 5,000/- chung lam an chawi a ni. Hei hian mipui tana phurrit lo tur ang bera duan a ni tih a tar lang chiang hle," a ti.

Tun hnaia Congress thuchhuah chungchang sawiin, "Mizoram Pradesh Congress Committee in thuchhuah a siamah hian nasa taka property tax pung niin tarlan a ni a, a thenah phei chuan 2221.79 % a pung angin sawi a ni hial a ni. 2221.79% a pung nia an tarlan Kanan Local Council area in ding hi May 14, 2016 khan survey a ni a, hetih lai hian Ordinary Building niin a chhawng a neilo bawk a, a len zawng hi 27ft x 24 feet a ni a, property tax Rs. 53/- a chawi a ni; he in vek hi October 17, 2018 khan survey that leh niin permanent building chhawng thum (3) a lo sa zo tawh a, a tax chawi pawh Rs. 780/- ah a pung ta a, hei hi 2021-22 thlengin a pe chhunzawm a ni. March 9, 2022 ah survey neih leh niin hemi tum hian chhawng 8 laia sang a lo ni tawh a, chumi anga tax hi chhut that leh niin Rs. 18,110/- an chawi a lo ngai ta a ni," a ti.

Aizawl Mayor chuan Congress ten an tarlan tam tak pawh hetiang deuh vek hi a nih thu a sawi a, UPIN number te thlengin heng pawisa an chawi aia tam chawi tur anga sawi te pek tam chhan hi a sawifiah bawk. 

Property tax hi kum kal ta khan Rs. 3.2 crores lak luh a ni a, Aizawl khawpuia cheng mi pakhatin Rs. 100/- vel chawi ang zela ni, "Khawpui danga property tax dinhmun te nena khaikhin chuan a tlem hle a ni," Rinenga chuan a ti.

15th Finance Commission in recommendation a siam - kum tin GSDP sanna ang tala Property Tax ti sang ngei tura rawtna angin Ministry of Finance, Department of Expenditure, Govt. of India chuan state sawrkar te property tax tipung turin a hriattir a ; Hemi bakah hian lehkha dang hmangin Ministry of Housing & Urban Affairs, Govt. of India chuan hma a rawn la chhunzawm bawk a ni.

Lalrinenga chuan, "Hetianga hma la lo te chu sawrkar laipuiin sum pek kawngah a hrek dawn tak avangin AMC pawhin property tax chhutna 3% of Annual Property Value (APV) ni thin chu 0.42%-a tipungin 3.42 % of APV a lo ni ta a ni. A punna rate hi a hniam thei ang bera tih a ni," a ti bawk.

AMC chuan, Kum sarih (7) liam ta 2015-16 atang khan Aizawl khawpuiah property tax hi khawn tan a ni an ti a, Property Tax khawn tan a nih khan self-assessment a kalpuiin, a neituin a in len zawng te, a hmanna te, a sak phung te leh property tax chhutna atana mamawh hrang hrang AMC-ah a thehlut a, chumi hmang chuan property tax pek a ni thin a. Mahse, data dik tawklo a awm ni a a lan avangin kum 2016-ah leh kumin kum tir khan AMC thawktute leh Local Council member ten Aizawl khawpuia in zawng zawng survey hna an thawk chhuak ta vek a, hei hian property tax chhutna dik zawk siamin a diklo engemaw zat te tan Tax pek tur dik a lo lang ta a, thenkhat an tlak hniam laiin thenkhat erawh an pung ta thung a ni, an ti.

Lalrinenga Sailo chuan Property Tax khawn mekah veng tam takah chuan kum hmalama an chawi aia hniam chawi tam tak an awm a ti. 

AMC chuan Property tax chungchanga hriatchian duh neite chuan AMC Office, Property Tax Section-ah office hour chhungin zawhfiah theih reng a ni a, tax chhut dan pawh langtlang takin hrilhfiah theih a ni bawk, an ti.