ZALEN April 20, 2025 : All Mizoram CSS Employees Coordination Committee (AMCECC) chuan sawrkar atanga thu lawmawm an hriat loh chuan naktuk atang hian an thil phut nawr nan ni thum chhung a huhoa chawlh lak, ‘mass casual leave’ neih an tum.

AMCECC hian an sawrkara an thil phut nawr nan April 15,16 leh 17, 2025 chhung khan hnathawk lova awm (pen/tool down strike) an lo nei tawh.

Sawrkar mi pawimawh hrang hrangte nen pawh inbiain an harsatna hi chin fel a la ni lo a, an thil beisei ang hi sawrkarin a tihhlawhtlin loh chuan AMCECC chuan a hmaa ruahmanna an lo siam tawh angin April 21-23, 2025 chhung mass casual leave lak an tum a ni.

AMCECC hian provisional employees/state contract-te tan an mamawh anga Departmental Promotion Committee (DPC) awlsam taka sawrkarin a siamsak thin anga CSS employee-te tan siam ngaiah leh corresponding post siam rem leh a tul dan azira equivalent/temporary post siam ngaiah siamsak tur te, CSS hnuaia thawkte chu en hran leh hlamchhiah an ni fo nia sawiin service-ah duhsak ve turte leh Mizoram sawrkar hnuaia a nghet a thawkten a hun taka hlawh an lak thin lai CSS hnuaia thawkten hlawh an la mumal lo fo chu an hriatthiam loh thute an sawi a ni.