ZALEN April 7, 2025 : Mizo Hnam Run chhung inkhawm - political session vawiina neiah a thusawitu MNF President Zoramthanga chuan tunhnaiah Union Home Minister Amit Shah nen an inkawm thu leh MNF sawrkar siam leh ngei tura fuihna a dawn thu a sawi.

Zoramthanga chuan, "MNF sawrkar liam ta hun sawi kaiin, Vairengte issue bakah Central BJP sawrkar nena kan inlaichinna kha a tha tawk lo hle a, BJP lam chuan lehlam (ZPM) an awn ta a ni," a ti.

MNF President chuan, "Pu Duhoma sawrkarah hian BJP-ten tel ve an inbeisei dan te, a hnuah MP inthlana ZPM chak kha khatih laia BJP-in Centrala sawrkar siam tura MP 272 an mamawh lai tak a ni a. Mizoram Lok Sabha MP pakhat chauh pawh a pawimawh em em lai a ni a. Khati chunga BJP tan an pe thei lo kha, an boruak a tha ta lo takzet a ni," a ti.

Zoramthanga chuan, "Pu Amit Shah chuan MNF chu sawrkar leh ngei se min duhsak a, grassroot atanga tan la nasa turin serious takin min fuih," a ti a. "Sawrkarna siam tura heti taka min duhsaktu hi ka la tawng ngai miah lo," a ti.

March ni 15, 2025 khan Union Home Minister Amit Shah chu Mizoramah lo kalin, hemi ni hian inkawmna hun an neih thu Zoramthanga chuan a sawi a. He inkawmna hi Union Home Ministry official-te ruahmannaa neih a nih thu a sawi bawk.

"Pu Amit Shah chuan ZPM sawrkar ka hmuh dan chungchang min zawt ngun viau a. Kei chuan thu danga chhang lovin, ZPM sawrkar chu an la thar lama nakinah thil an zir zel anga an la hre chhawm ve mai ang, ti bakin ka chhang lo," a ti.

Union HM nen an inkawm chhan ber sawiin Zoramthanga chuan, (Central-a Congress sawrkar lai) Burma rama remna a awm theihna tura palai hna a thawh dan a hrilh a ni.

Zoramthanga chuan, "Burma underground intelkhawmin federal state siam an duh a, a leh lamah Burma sipai sawrkar pawhin federal sawrkar siam an remti ve bawk a. Rangoon, Bangkok-ah vawi tam ka kal hnuah India sawrkarah ka report a, anni'n Pu Ajit Doval-a (National Security Advisor of India) nen min tir ta a, kan hlawhtlin teuh hle tih thu ka hrilh," a ti.

"India rama exposure nei tura phur taka ruahmanna siama hmalakna kan neih laiin Burma election-ah Aung San Suu Kyi a sawrkar ta a, hmalakna a tawp zui ta a ni. Tun dinhmunah chuan Sipai sawrkar hnuaiah thil a khirh ta em em a ni," tia Amit Shah a hrilh thu a sawi.

"Amaherawhchu, hmana exposure neih an duh dan leh India sawrkar pawhin hmachhawpa a lo neih tawhte kha ka sawi a. Hei hi Union HM chuan a ngai thutak hle a ni," a ti bawk.