Chawhchawrawi

April atangin car man a to dawn

Admin - Mar 30, 2021

Maruti Suzuki chuan an car model hrang hrang chu 1-6% velin an tisang dawn tih an puang tawh a, Nissan, Datsun leh Renault te pawhin car man an tisang dawn tih a chiang tawh bawk.

Car siam chhuaktu company te chuan April atangin an car siam chhuah hrang hrangte chu a man an tisang dawn tih an sawi a, hi a chhan ber chu bungrua an lakluhna man a san vang niin an tarlang. 

India rama car siam chhuaktu company te chuan April 1, 2021 atangin car man hi a to dawn tih an sawi a, a sanna hi 1-6% vel a ni ang. January khan car man hi tihsan a lo ni tawh a, tun hi kumina a vawi hnihna tur a ni ang. 

Maruti Suzuki chuan an car model hrang hrang chu 1-6% velin an tisang dawn tih an puang tawh a, Nissan, Datsun leh Renault te pawhin car man an tisang dawn tih a chiang tawh bawk. Car man punna tur hi 1-6% chauh ni mah se a pawisa chuan Rs. 5,000 atanga Rs. 34,000 inkar daih a ni dawn a, namai lo tak a ni. 

Maruti Suzuki hi India rama car siam chhuaktu company lian ber niin, kum 2020 khan model chi hrang hrang 1,563,297 zet an siam chhuak a ni. He company hi 1982 khan India sawrkar chuan a din a, tunah hian Suzuki chuan 56.21% share neiin, a bak 43.79% chu sawrkar kutah a la awm thung. 

An car siam chhuah - Alto, Baleno, Celerio, Ciaz, Dzire, Eeco, Ertiga, Ignis, S-Cross, S-Presso, Swift, Vitara Brezza, Wagon R leh XL6 te chu tunah hian India rama car hralh kal ber berte an ni mek. 

Nissan, Datsun leh Renault te chuan car man an tihsanna tur zat hi an la puang zar ve lo thung a, hetih rual hian Nissan hian tun hnai khan Magnite man chu Rs. 30,000 in an lo tisang tawh a ni.