Manipur-a assembly inthlan thawh hnihna neih tura a thawh hmasa zawk atana vote thlak hma lawkin Chief Minister N Biren Singh chuan party dangte campaign au hla ber, Armed Forces (Special Powers) Act (AFSPA) a sawi chhuak ve ta a. An sorkar kum nga liam ta chhungin nakin lawka an state atanga he dan hlih a nih theihna turin hma an la tih a sawi.

Sipaiten ram buaia thuneihna sang tak an neih theihna dan, AFSPA hi sipaiten an chetnaa inphen nan an hmang nia sawi thin a nih avangin duh lohna a nasa hle.

Tun tum inthlan turah pawh hian party dang zawng zawngte chuan an state atanga hlih chu an campaign-na pui ber pakhat a ni a, rorel lai, BJP erawh a ngawih tlat avangin sawi leh sel an hlawh hle. 

Biren Singh chuan, “Myanmar nen kan inri a, thil tam tak a thleng thin a. He dan hlip tur hian sorkar laipui hi hmun hmasak a ngai a. Chumi atan chuan helho nena inbiakna pawh kalpui mek zel a ni a. State sorkar hian kum nga liam ta chhung khan hna nasa taka thawkin nakin lawka he dan hlih a nih theihna turin BJP hian a lungphum a lo phum a ni,” a ti.

Inrinni kha inthlan thawh khatna campaign hun tawp a ni a. Chief minister pawh hian hun a awm chhungin nasa taka campaign-in a tih fo thin angin a hniam ber thlengin a kawm kual a ni. 

Biren Singh hian NDTV-in an kawmnaah BJP chuan bial 60 awmah 40 vel an lak a ring tih a sawi a. Inthlan zawhah hruaitute pawh an insiksawi a rinawm thu a sawi bawk.

“Manipur hi Assam a ni lo tih kan hria a; mahse, BJP tih dan thin angin chief minister tur inthlan hmain kan sawi lawk lo. Thuneitu sang zawkten thutlukna an siam ang a, chu an thutlukna lo ngaichang turin ka inpeih,” tiin a sawi a. Assam ang bawkin BJP chuan chief minister a thlak thei tih a sawi.