ZALEN April 13, 2025 : Assam Rifles-ten Aizawl khawpui lailia an hmun an chhuahsan mek a, hetihlai hian he hmuna LSC nei zingah an LSC sawrkara surrender an la awm belh rih lo.

AR ram luah zawng zawng chhunga LSC neite chu commandant bungalow area-ah mi pali, McDonald Hill area-ah mi pathum leh main barrack area-ah mi 54, an vaiin mi 61 an ni a. AR ram chhunga LSC neite chungchangah hian Central YMA chuan PIL case an lo file tawh.

LSC nei mi 61 zinga mi 13-ten an LSC an surrender tawh a. La surrender lote hi sawrkarin thil awm dan a sawipui mek nia thudawn a ni.

AR ram luah zinga LSC nei surrender tawhte hnenah hian sawrkarin lawmthu sawina ziakin a pe vek dawn nia thudawn a ni bawk.

March 24, 2025-a thukhawm NGO Co-Ordination Committee (CYMA, MUP, MHIP, MZP, MSU) chuan AR-in Aizawl khawpui lailia an awmna an chhuahsanah tumah mahni hmunhma atana hma la lo turin an ngen.

AR ram luah chhunga mi mal LSC nei eng emaw zatin mipui hmakhua ngaia an LSC an hlan let chu ropui an ti a, ram leh hnam tana an inpekna an ngaihlut rualin LSC nei dangte pawhin ram leh hnam tana hlan ve turin an ngen nghal bawk a ni.