Argentina khawchhak lama ruah tam tak leh darkar khata km 150 zeta chak thlipui thawk avanga chhiatna hrang hrang thlengah mi 14 an thi.

Buenos Aires atanga chhim lam km 570 vela hla, lawng chawlhna khawpui, Bahia Blanco chu Inrinni khan a nuai a, chenna in tam tak chhiain power a awm lo bawk a. Khawpui ber pan hian a kal zel.

President Javier Milei-a’n pisa a luh atanga chawlhkar khat lekah chhiatna hi an tawng a ni.

An thenawm, Uruguay-ah mi pahnih thi an awm ve bawk.

Thuneitute chuan ruah leh thlipuiin Bahia Blanca a thlen hian roller skating competition neihna hmun sports centre chung a hawk a, a chim zui a, mi 13 lai an thi tih an sawi.

Mi 14 dangin hliam an tuar bawk a, kang thelhtuten a chim kara tangte lak chhuah tumin an bei zui.

Inrinni zanah khan Buenos Aires khawpuiah chuan bungrua leh nunna atana hlauhawm thleng thei a nih avangin orange alert tihchhuah a ni.

Pathianni tukah khan khawpui dai, Moreno-ah thingzar tliakin hmeichhe pakhat delhin a thi bawk.

Tual chhung chanchinbuten video an tihchhuahah chuan Buenos Aires daia Aeroparque tumhmuna thlawhna dingte chu ruahin a nan nasa hle a. Mihring tana thlawhnaa luhna tur leilawn tawlh theite chu thliin a lên dawr dawr bawk.

President Milei chuan Pathianni tlai khan Bahia Blanca hi tlawhin chhiatna thlen dante a en.

Buenos Aires hmar lam chiaha awm, Uruguay-ah pawh in chung hawk leh thing tlu a tam hle a. Pathianni tukah khan mi pahnih thi an awm tih thuneituten an sawi.