ASEAN ramte thutlukna hi Myanmar chuan a pawm lo hle a, Inrinnia foreign ministry-in thu an chhuah, sorkar chanchinbu, Global New Light-in a tar lanah chuan anmahniin ‘five-point plan’ an neih an zawm zel dawn zawk tih an sawi.

“Myanmar chuan ASEAN hian inpumkhat inlungrualna a kalpui zel theih nan an member-te leh ASEAN Charter zah sela; a bikin intluktlanna, mahnia rorel inrel an nihna leh an member-te ram chhung thilah inrawlh lo rawh se,” an ti let ve thung.

Myanmar sipaiten foreign minister atana an ruat, Wunna Maung Lwin-a chu Phnom Penh-a intawh khawmah hian sawm a ni lo va, February thlaa foreign ministers’ retreat an neihah pawh tel lo tawhin Min Aung Hlaing-a pawh nikuma summit an neihah a tel thei tawh lo bawk.

Association of Southeast Asian Nations (ASEAN) member ram 10-a foreign minister-te chuan Myanmar-a rorel lai sipaite chu an pawlin thla 15 chhunga an ram buaina a felna tura hmalakna tur a duante a taka an kalpui hma chu an zinga tel ve an phalsak lo.

Phnom Penh khawpuia ASEAN regional meeting an neih zawha thuthar lakhawmtute a kawmnaah Cambodia foreign minister, pawl aiawha Myanmar dawrtu ni bawk, Prak Sokhonn chuan sipai chakna hmanga thuneihna chang mektu general-te chuan  ruahmanna an siamte an zawk ngei hnuah an kal zel dan tur an ngaihtuah tha leh dawn tih a sawi.

Zirtawpni khan foreign minister-te thukhawm chuan Myanmar sipaiten an ram rorelna an chhuh chungchanga buaina an neih tihfelna tura April, 2021-a Five-Point Consensus an siamte zawm a hlawh lo chu an dem a. He an ruahmanna siam hi army chief leh sipai hotu, Senior General Min Aung Hlaing pawh a telna niin State Administration Council (SAC) chu November-a an summit neih leh hmaa an ruahmanna kalpui tura tih a ni.

Minister-te chuan, “Naypyidaw thuneituten hma an lakna a tlem leh a hun taka Five Point Consensus an tihlawhtling lo hi pawi kan ti hle a ni,” an ti.

Tar lan fo tawh angin Myanmar-ah hian sipaiten mipui thlan, Aung San Suu Kyi-i kaihhruai sorkar chu February, 2021 khan paih thlain thuneihna an chang zui a, mipui sorkara thuneitu tam tak an man bawk.

Sipaite hi ram mipuiin nasa takin an dodal a, anmahni dotu tur ralthuam keng pawl hial a ding.

Sipaiten thuneihna an chan hnuah hian anmahni dodaltu mi 2,158 vel zet thah an ni tawh.