February thlaa Myanmar rama thuneihna chelhtu, army general chu an awmna ram biala ram hruaitute intawh khawmah sawm a ni ve lo.

Association of South East Asian Nations (Asean) chuan an intawh khawm turah hian Myanmar ram aiawh turin Gen Min Aung Hlaing-a ai hian politics-a inhnamhnawih lo pawl a sawm daih a ni.

Ram 10 intelkhawmna pawlin hetianga hma an la hi mak tih a hlawh a, an pawl hian an member-te ram chhung buaina thilah inrawlh an duh ngai lo.

Asean chuan sipaite hian Myanmar rama boruak tha lo awm chu titawp tura hma a lak dan chu a tawk lo tih a sawi.

August thla khan Gen Min Aung Hlaing-a hi prime minister-ah a insiam a, emergency an puan mek pawh sipai leh anmahni dotu helho an inbeih chhung chuan pawh sei zel a nih tur thu a sawi bawk.

Asean hian thuchhuah siamin Zirtawpnia hmanhmawh taka an member ram foreign minister-te intawh khawmah sipai sorkar hotu sawm lo mah se October 26-28 chhunga summit pangngai an neih turah hian an sawm dawn lo tihna erawh a nih loh thu an tar lang.

Myanmar sipai hotute hian inbiak an duh lo va, an rama thil thleng mek dinhmun siam tha tura hma lak an tum lo niin an sawi a, an ram aiawhtu ni mek, mipui sorkar aiawhte chu an hreng mek bawk si niin an sawi.