ZALEN February 2, 2025 : ASEP General Headquarters chuan thuchhuah siamin tun hnai chho hian Aizawl khawpui chhung bazar hmun hrang hrang, sawrkar pisa leh mi inahte vak kuala ramsa rep zuar an tam leh ta nia sawiin hei hi dan bawhchhiatna lian tak anih avangin hetiang tih chingte leh lo lei thintute chu sim turin an ngen.

ASEP thuchhuah tarlan danin ramsa rep zuartu leh leitu hi The Widlife (Protection) Act, 1972 dan angin dan bawhchhetu lian tak an ni ve ve a. Sawrkar pisa ngat phei chu hetiang thil zawrh ngamna hmun tur a ni lo hulhual a. A zuartu-in a zawrh ngam chuan lei thin an awm tihna a ni tiin lo inenfiah theuh turin ASEP chuan a ngen a ni.

ASEP chuan mi tam takin retheih leh harsat vangte, dan phal loh a ni tih hriat loh vanga ti an nih thu an sawi thin a. Retheih vanga dan phal loh hmang khera sumdawn hi ching lo turin ASEP chuan an ngen a, thuneitu lam pawh hetiang tih chingte manchhuahna kawngah chak taka hmala turin an phut bawk.