Vawk note indaihlohna a nasa ASF lenlai a nih vangin lakluh khap a la ni. Mithiam ten a him an tih hun ah Vawk hrisel lalut turin ruahmanna an siam ang.

Lakluh theih hunah Vairengte velah emaw quarantine station siam a him hnuah vawk vulhtute chan theih tura ruahmanna siam chungchangte ngaihtuah mek.

Aizawl; Mizoram sawrkarin African Swine Fever (ASF) vanga vawk suat neitute hnena zangnadawmna pek tur leh vawk suatna senso atana sawkar laipuia cheng vaibelchhe 58 bawr vel a dil mek chu chhanna a la dawng lo a. Hetihlai hian ASF vanga Vawk thahnemtak thihna thleng mek chu chhiatrupna (calamities) ah puan thuai a ni dawn.

AH&Vety minister Dr. K. Beichhua-an ZALEN a hrilh danin, ASF vanga vawk suat thu hi amahin central chu hmaichhanah a dawr tawh a. Sawrkar laipui atanga tanpuina dawn tur state matching share 50:50 chu 90:10 tura ngenin, chhanna erawh dawn a la ni lo a.

ASF vanga suat ni lo, a thi pangngaite pawh chhiatrupna (calamities) a puang turin Mizoram sawrkar ah hma an la mek tih sawiin, Dr. K. Beichhua chuan vawk thi neitute hnena zangnadawmna chu State Disaster Manangement Response Fund guideline awmsa angin pek an nih tur thu a sawi.

Mizoram Pig Farmers Association chuan tunhnai khan CM Zoramthanga chu hmuin state pawn atanga vawk lakluh a khap chu hlip turin an ngen a. Thawhlehni hian CM hoa official te nen sawi tur a ni.

October 1, 2021 thleng khan ASF vangin Mizoramah vawk 28,769 a thi tawh a, khua/veng 269-ah ASF a leng tih finfiah a ni. AH&Vety in report an dawn chinah, ASF infected area-ah Vawk 10,150 suat a ni tawh a, ASF lenna nia rinhlelh khua/veng 7-ah vawk 190 suat tawh nen a vaia Mizorama vawk suat tawh chu 10,340 a ni.