Aizawl: AH&Vety department chhinchhiah danin nimin thleng khan African Swine Fever (ASF) vangin Mizoramah vawk 4080 an thi tawh.

Department chhinchhiah danin Zirtawpni bikah khan ASF vang hian vawk 85 an thi leh a, khua/veng engemaw zat chu vawk hri lenna hmunah puan a ni a, heng hmunah te hian vawk talh, lakluh leh lakchhuah phal a ni lo. AH&Vety department chhinchhiah danin Mizoram hmun hrang hrangah vawk 273 thi a awm bawk a, heng vawk thihna chhan hi hriat a ni lo. 

Mizoram khaw malkhaia vawk hri ASF tuar nasa ber Lungsen khuah chuan vawk thi a awm tawh meuh lo a, ruahtui tlak hnuah chuan hrileng hi a ziaawm niin ZALEN chuan thu a dawng. Lungsen hi ASF natna tuar nasa ber an ni a, ASF vang hian hriattheih chinah vawk 756 an thi a. Electric veng, Lunglei chu pahnihna niin vawk 226 an thi a, pathumna Chawngte ah vawk 215 an thi bawk. Aizawl khawpui bikah chuan Bawngkawn veng chu hri tuar nasa ber niin vawk 210 an thi tawh nia hriat a ni.