ZALEN April 20, 2025 : Mizoram leh Assam ramri buaina chin fel tumin sawrkar official-te April 25, 20205 hian Guwahati-ah an inbe dawn a. Hetih lai hian ramri hmun hrang hrangah boruak a muanawm a, harsatna thleng a awm lo nia thudawn a ni.

Mizoram leh Assam inrina, Thinghlun lamah boruak duhawm lo thleng a awm hriat a ni lo a, Mizoram police (4th IR) an duty a, Assam pawhin duty an la indah.

Bairabi lamah pawh ramri-ah boruak a ralmuang tih ZALEN thudawnna chuan sawiin ramri hnaih, Zophaia Assam-in mandir sak an tumnaah tun thlengin Mizoram police pali zel darkar 24 chhung an la duty chhunzawm a, Assam pawhin duty an la dah chhunzawm zel bawk.

Vairengte Aitlang leh Sabual hmunah te Mizoram police-te ngawrh takin an la duty bawk a, Assam pawhin duty an la indah a, boruak a ralmuang a, hriat theih chinah harsatna thleng a awm lo.

Mizoram leh Assam inrina dang, Phaisen leh Saiphai lamah pawh boruak a ralmuang a, harsatna thleng a awm lo niin thudawn a ni bawk.

Hetihlai hian tun Zirtawpnia Guwahati, Assam-a Mizoram leh Assam secretary-level meeting neih tur chungchang thlirhovin tun hnai khan Mizoram State Boundary Committee chu an chairman, Home Minister K. Sapdanga hovin an thukhawm a, hetah hian minister chuan ramri him tak, mipuite thlamuang taka an khawsak theihna tur nawr chhuah chu an thupui ber a nih thu a sawi.

Home minister chuan Mizoram tana chânna awm lo tura theihtawp chhuah a nih thu sawiin Mizoram leh Assam ramri zirchiang tur study group member pali awmna pawh kumin January 25 khan din a nih thu sawiin he study group hian chhuanawm takin hma an lak thu leh anni zarah document tan chhan tur pawh an nei tha tawk tawh hlea an inhriat thu a sawi bawk.