India-a state inthlanpui neih tur chu Thawhlehni khan mi nuai telin vote thlakin tan a ni ta a. Tun tum inthlanah hian Mizoram leh Chhattisgarh atangin tan a ni.

State panga inthlang turte hi November 7 leh 30 inkarah mipuiten vote an thlak ang a. December 3 hian a ruala vote tlate chhiar tura ruahman a ni.

Tun tum inthlan hi nakuma ram pum inthlanpui neih tur thlir lawkna leh boruak hril thei tura ngaih a nih avangin ngaihven a hlawh viau hlawm.

Politics chinchang hriate chuan kum 2024 inthlanpuia rorel lai leh anmahni eptute dinhmun thui tak a hril thei dawn niin an sawi hlawm.

Tun thla chhunga inthlang tur zingah hian state lian, Madhya Pradesh leh Rajasthan bakah chhim lama Telangana a tel bawk.

Heng state inthlang tur zingah hian Prime Minister Narendra Modi-a kaihhruai BJP-in ro an relna chu Madhya Pradesh chiah hi a ni rih a. Eptu, Congress party-in Chhattisgarh leh Rajasthan-ah thuneihna an chang mek.

Thawhlehni zing atang khan hmarchhaka Mizoram leh Chhattisgarh lailia bial 20-ah mipuiten an aiawh tur thlang turin vote an thlak tan.

Tun tum inthlan hi May thlaa Manipur-a chi leh chi inkara buaina a chhuah chiam hnua hmarchhak huam chhunga inthlan hmasa ber tur a ni.

Manipur leh Mizoram hi BJP kaihhruai tangrual, National Democratic Alliance (NDA) zawmtu party-te sorkarna hmun a ni a. Buaina a chhuah hnuah khan mi 12,000 vel zet chu Mizoramah hian an tlanchhe tawh.

Thla hmasaa BBC-in Mizoram Chief Minister Zoramthanga a kawmnaah khan BJP-in buainaa hma a lak dan chu a sawisel a, Prime Minister Modi-a nen pawh inthlan campaign-ah engmah chet dun an tum lo tih a sawi.

Zoramthanga-a kaihhruai Mizo Nationalist Front (MNF) hian tun inthlanah hian thuneihna chang chhunzawm turin Zoram People’s Movement (ZPM) leh Congress party a khing mek a ni.

Chhattisgarh-ah hian rorel lai, Congress party leh BJP chu inbei bei tura ngaih a ni a. He state hi Congress-in thuneihna an channa state pali zinga mi a ni.

Thuneihna an chan zui theih nana mipui hnena inzawrh nan hmeichhia, lo neitu leh tribal-te tan ham\hatna an siamsak tur thu an tlangaupui nasa hle.

Thawhlehnia vote an thlakna hmun bial 20-te hi Bastar region an tih, Maoist helho tamna hmun a ni a. Inthlan muanawm tak neih a nih theih nan paramilitary force thahnem tak tirh luh an ni.

Thawhlehni tukah khan paramilitary sipai pakhat chu Sukma region-a helhovin thil an tihpuah ni ngeia hriatah hliam a tuar niin NDTV news channel chuan a tar lang.