THenawm Ramah Pawh

Greece ram thenawm, Turkey-ah pawh ram a kang nasa hle a, thuneitute chuan an ram chanchina ram kang rapthlak ber thelh hna an thawk mek.

Turkey-ah hian chhim lam vaukamah mi pariat an thi tawh a, mi sang tel hmun himah an insuan chhuak tawh a. Zirtawpni khan power station bul hnai veng paruka chengte chu thiar chhuah leh an ni bawk.

Khawvel hmun hrang hranga ram kang chhuak nasa hi sik leh sa inthlak nasa lutuk vangah mi thiamten an pui a. Khaw lum uchuak leh khaw ro lutuk, ran a kan duhna ang chi a thlen nasa niin an sawi.

Ram hrang hrang sorkarten tan la nasa hle mah se khawvel pum hi industrial era intan tirh lai ai khan 1.2°C chuang mahin a lum tawh zawk.

Greek khawpui, Athens hmar lama ram kang chu alh zau zelin khualzin leh a mi cheng sang tel hmun himah an insuan chhuah phah.

Thli na tak leh khaw lum lutuk chuan ram kang hi thelh a tiharsa hle a, mi pahnihin an thih phah tawh a, pakhat hi kangthelhtu a ni nghe nghe.

Athens dai velah chuan chhum dum chhah tak leh meivap a tam hle a. Hei vang hian ram kang hlat deuhva mite chu pawn chhuak tam lo tura tih an ni.

Hmun 150 chuangah ram hi a kang mek nia sawi a ni a. Hmun ruka mi chu a hlauhawm zual niin an sawi bawk.

Greece hi Europe khawmualpuia ram dangte ang bawkin tun nipuiah hian khaw awm dan uchuak takin a nuai ve tho va. Prime Minister Kyriakos Mitsotakis chuan ram kang an tawrh mek chu ‘sik leh sa inthlak nasa lutuk a taka a lan chhuahna’ tiin a sawi.

Kangthelhtu za telin tui phur thlawhna (water-bombing aircraft) 20 chuang nen thelh tumin an bei mek a. Kangthelhtu leh thlawhna hi UK, France leh United States atanga thawn luh belh mek an ni bawk.

UK sorkar chuan kar tir lama Greece-a ram kang a zauh zel lai khan ‘kang thelh lama tawnhriat nei tha’ an thawn thu Home Secretary Priti Patel chuan a sawi.

Hriat lawk loh thliin a puih avanga inman kai chak tak ram kang hian Athens hmar lam a hual vel mek a. Khawpui daia kangthelhtute pui tura inpe mipa kum 38 mi chu electric ban tluin  delhin a thi.

Thi dang hi Athens Chamber of Commerce-a an president ni lai, Konstantinos Michalos a ni a. Ram a kanna bul lawka factory-ah thichhawnga chhar a ni a, a hnuah a thi tih puan a ni.

Anni bakah hian mi 20 velin hliam an tuar tawh bawk.

Kar kal ta tir lamah khan khaw lum lam chu 40°C niin kartawpah hian 35°C velah tla thla tawh mah se ram kang hi a zauh zel rin a ni.

Athens khawpui daia cheng mi sang tel chu ram kangin in, car leh sumdawnna hmunte a kan tan khan inthiar chhuak tura lo hriattir a ni tawh.

Ram kang hi khawpui bul lawka Evia thliarkar pawhin an tuar a. Anni bakah hian hman laia Olympia khawpui thin, Olympic Games pian chhuahna hmun pawh a tibuai mek bawk.

Government Minister Nikos Hardalias chuan kangthelhtute dinhmun hi a hlauhawm hle tih a sawi.

"Kangmei hi a kal zel dan tur sawi lawk a harin a inman kai chak si a, kan thawktute hian chhun zan zawmin, anmahni pui tura inpete nen an bei mek a ni,” a ti.

Evia vaukam hi meiin a hliau hnaih zel avangin a cheng leh khualzinte chu lawngleng leh sangha manna lawng hmangin an inthiar chhuak.

“Chhiatna lian tham thleng thei chungchang hi kan sawi a, sawi fiah dan mai pawh ka hre thiam lo a ni,” tiin Evia-a coastguard Sotiris Danikas chuan broadcaster ERT hnenah a sawi.