ZALEN April 28, 2025; MZP Hqrs. Lunglei ten ATL road Pukpui dai-ah tukin dar 7 atang khan lirthei lut leh chhuak tur an dang tan.

MZP Hqrs Lunglei hruaitute chuan an lo ruahman lawk tawh angin Aizawl - Thenzawl - Lunglei (ATL ) Road Kanghmun South atanga Pukpui chin siamna tur sum Mizoram sawrkarin a pawt peng nia an hriat avang leh sum pawh pen hi hnukkir tura ni 15 chhung sawrkar an nghah hnuah an duh ang chhanna sawrkar atanga an hmuh loh avangin tukin dar 7 atang khan Pukpui daiah lirthei lut leh chhuak turte tiam chin awm lo dan an tan a, MZP Hqrs Lunglei hruaitute chuan Pukpui daiah lirthei an dan hnuah an beisei ang sawrkar atanga chhanna an hmu lawklo a nih chuan a tul angin Hrangchalkawn lamah pawh lirthei dan chhunzawm an tum tih an sawi. 

MZP Hqrs Lunglei te hmalakna hi Lungleia lirthei hmanga eizawng pawl hrang hrang ten an thlawp thu thuchhuah an siam bakah Lunglei leh a chhelvel Lunglei khawpui paltlang maxi cab service leh lirthei hmanga eizawng pawl hrang hrang te pawhin an thlawp tih thuchuah an siam a, hei bakah hian Lunglei Thalai Pawl, Chhimbial Chhantu leh Hnathial Thalai Pawlte pawhin MZP Lunglei hmalakna hi an thlawp tih an sawi bawk a ni. 

Tukina he thu lakkhawm lai thleng chuan kal luih tum an awm lo a, magistrate leh venghimtu police lam duty awmin MZP, MSU hruaitute bakah an mahni thlawptu pawl hrang hrang aiawhte an duty. Aizawl lam pan maxi cab te he kawnga an tlan loh bakah duty te motor tih loh chu lirthei veivak hmuh tur a awm meuh lo niin thu dawn a ni.

Hetihlai hian ZPM Southern Hqrs Lunglei chuan thuchuah siamin ATL Road siam chungchangah chhim lam mipuite lungawina ngei tura hmala tura sawrkar an phut thu leh party office hawn pawh hreawm an tih thu thuchhuah siamin, vawiin April ni 28.2025 pawh hian party office hawng mahse office hna tul engmah thawh loh an tum tih an thuchhuah ah chuan an tarlang.

#ZalenNews