inkharkhip REI TAWH

Australia-ah hian an rama mihring cheng zahve aia tam, mi maktaduai 13 vel chu inkharkhip hnuaiah an awm leh mek.

Sydney khawpui bik hi chawlhkar li zet an inkharkhip tawh a, heti chung hian hri kai hmuh chhuah hi a hniam lam aiin a pung zawng zelin a la kal.

NSW (Sydney awmna state) thuneitute chuan Inrinniah pawh khan ni khata hri kai hmuh chhuah chu pung lehin mi 163-in an kai tih an sawi.

State Health Minister Brad Hazzard chuan Premier Gladys Berejiklian hnenah NSW bikah hian state danga invenna damdawi thawn zat aia tam thawn lut turin a ngen.

Hazzard chuan, “New South Wales dinhmun hi a chhe zel a nih chuan kan ram pumah pawh harsatna lian tak a thleng dawn tihna a ni,” tiin a sawi a. “New South Wales hi Australia ram pum chhuahka a ni,” a ti bawk.

Johns Hopkins University-in a chhinchhiah dan chuan Australia-ah hian Covid-19 kai mi 32,594 an awm tawh a, mi 916-in an thihpui tawh bawk.

-----------------------------------------------------------------------------------------------

Australian khawpui hrang hrangah Covid-19 darh zel tur ven nana inkharkhip leh inkhuahkhirhna khawng tak tak kalpui duh lohna lantirin mipui tam tak an inhawr khawm.

Sydney-ah chuan mi sang chuang an pung khawm a, Melbourne leh Brisbane-ah pawh lian tham vak lovin duh lohna lantir a ni.

Mipuite hi Sydney laili-ah kawng zawhin ‘zalenna’ tiin an au va. Officer-te chuan mi 57 an man.

Australian sorkar hian an ram chhunga hri kai an pun leh avangin inkharkhip an kalpui thar leh mek.

Hri a len tirh lamah khan ramri an khar a, inkhung hran dan tur dan zam khauh tak leh ram bial bila inkharkhip an kalpui a, hei hian hri darh tur pawh nasa takin a veng a. Tunah hian a hmaa mite aia inkai awlsam zual, Delta variant chuan a luhchilh ve mek.

Invenna damdawi la an la tlem hle a, ram changkang zingah chuan pek la tlem berna niin mipui 14% pawhin an la la tling lo.

Inrinnia kawng zawhte hian Sydney lailia Haymarket bulah kawng an zawh.

New South Wales (NSW) hriselna thuneitute chuan Haymarket chhehvel hi a hma lawkin Covid hotspot-ah an puang niin ABC News chuan a puang nghe nghe.

Mi thenkhat chuan placards kengin, “I hmai tuamna hlip la, i aw chhuah rawh,” tih te, “Tho rawh Australia,” tih te a inziak.

Mipuite hian Sydney-a town hall kawtah kawngpui an dang a. Pawl pakhat chuan officer-te chu um ruakin an vawm bawk.

“NSW Police Force chuan mi mal duhthlanna a zahsakin a hre thiam em a, an duh an sawi theihna muanawm taka pun khawm theihna an neih pawh a zahsak a. Hetih rual hian vawiina an pun khawmna hi Covid-19 Public Health Orders kalpui mek bawhchhiatna a ni,” an ti.

Melbourne-ah pawh mi tlem azawngin inkharkhip duh lohna hi an lantir a, Parliament House tualah hal mawi an hal a. Brisbane-a Botanic Gardens-ah an pung khawm bawk.