ZALEN April 5, 2025 : Financial year 2024-25 chhung khan Mizoramah a thlawna thisen pek percentage chu 93.71% a ni a, voluntary donation hi Association for Voluntary Blood Donation (AVBD), Mizoram-in target kan siam 92% aiin a sang zawk a, AVBD chuan lawmawm kan ti hle.

Mizoram puma thisen pek dinhmun chhinchhiahtu Blood Transfusion Service, Mizoram State AIDS Control Society (MSACS)-in an chhinchhiah danin, April 1, 2024 - March 31, 2025 chhung khan Mizorama blood centre 11-ah thisen unit 34,752 pek a ni a, chung zinga unit 32,566 chu pek bik nei loa a thlawna pek (voluntary donation) niin, voluntary donation hi 93.71% a tling.

Kum 2024-25 chhung hian blood centre hrang hrangte'n blood donation camp vawi 611 an buatsaih a, chungah chuan thisen unit 22,602 pek a ni.

AVBD, Mizoram chuan FY 2024-25 chhunga voluntary blood donation percentage zat thlen tum (target) kan siam a, chu chu 92% a ni. He kan target hi tihhlawhtlin ngei tumin blood centre hrang hrangte nen theihtawp chhuah a ni a, Mizoram mipui, a bikin thalaite'n theihtawp an chhuah bawk.

Sawrkar lama hotute leh Mizoram mipuite nen kan tanrualna avangin voluntary blood donation-a target kan siam kan khûm thei hi lawmawm kan ti em em a. Target khûm a nih theih chhan, thisen petute zawng zawng leh Mizoram mipui chungah lawmthu an sawi.

April thla hi Good Friday thla a ni a, AVBD chuan Good Friday puala thisen pe turin Mizoram thalaite an ngen. Chhandamtu Isua Krista kraws-a khenbeh a ni a, an tana thisen chhuaka a tawrhnate hre rengin mi dangte an chhanhim ve theih nan Good Friday puala thisen pek hi a inhmeh em em a, thisen pe turin thalaite an ngen a ni.

Mizorama thisen mamawhna a sang zual zel a, chuvangin thisen pek hi tawpsan mai theih a ni lo. Thisen mamawh damlote'n a hun takah thisen an dawn theih nan leh nunna chhanna atan thisen pek uar zel turin mipui an sâwm a. Thisen pek lamah hma an sawn zel theihna tura AVBD-in an phâk ang tâwka hma an laknate tawiawma thlâwp zel turin mi tin an ngen bawk.