Tute nge Gandhi-a hoa inkawm bik chu?

1. Azad-a hian Congress hi kum 1970 chho khan Jammu & Kashmir-ah a zawm a, Kashmir University atanga post graduate a zawh hnu, kum 1973 atangin kum 1975 thleng block general secretary a ni.

2. Jammu & Kashmir Youth Congress president-ah kum 1975 leh 76 khan a tang.

3. Kum 1977 khan Indian Youth Congress general secretary a ni tan a. Hetih lai hian Congress thalai leh worker dang eng emaw zat nen lung in an lut sek a. A insawi dan chuan a tan rei ber hi Tihar jail-a December 20, 1978 atanga January thla tawp, 1979 thleng a ni a, Indira Gandhi man duh lohna lantirnaa a tel vang niin a insawi.

4. Kum 1980 khan Indian Youth Congress-ah national president a ni zui ta a. Kum 1985 vel thleng he nihna a chelh lai hian AICC-ah general secretary a ni bawk.

5. Thalai hruaitu a nih lai, kum 1982 atang khan union minister a ni tan a, kum 2014 thleng kha chanpual hrang hrang chelhin a ni ta reng a ni.

6. Rajiv Gandhi-a’n May, 1991-a thah a nih thlenga a kaihhruai, Congress Parliamentary Board-ah pawh a tel ngar ngar a, PV Narasimha Rao-a kaihhruaiah pawh a tel zui zel a. Party rorelna sang ber, Congress Working Committee (CWC)-ah pawh kum 40 dawn a tel bawk.

7. Rajya Sabha-a oppositioon leader nihna pawh Azad-a hian kum sarih a lo chelh tawh.

Aizawl : Gulam Nabi Azad-a’n a chhuahsan hnuah Congress party chhung inrelbawlna chungchangah titi a awm zui nasa zel a. Jammu & Kashmir chief minister hluiin party chhunga intibik awmin thutlukna pawh chung mite duh dana siam mai nia a sawi chungchang phei chuan sawi zui a hlawh hle.

Zirtawpnia party-a a nihna zawng zawng kalsana member a nihna pawh bânsantu, Azad-a hian party chief Sonia Gandhi hnena phek ngaa sei a bânna a thehluhah Rahul Gandhi chu nasa taka sawiselin a hova intibikten party-ah ro an rel a, naupang chhia taka a awmna chuan an party a tichhia niin a sawi.

Azad-a hian Gandhi-i chu ‘a hminga hruaitu mai’ nia sawiin ‘thutlukna pawimawh chu Pu Rahul Gandhi-a emaw, a nih loh pawhin a security guard leh a PA-te siam’ nia sawiin a chhuah chhe hle.

Gandhi-a hova inkawm hranga mi dangte rawn lova thutlukna siam thin nia Azad-a’n a sawite hi tute nge tih zawhna a tam a, chanchinbumite pawhin an umzui nasa hle.

Security guard a tih hi KB Byju-a nia sawi a ni a, ani hi Special Protection Group-a tel thin  a ni a, Gandhi-a team zawm zuiin party-ah general secretary hial a ni tawh.

Byju-a hian Congress party-ah nihna pangngai tak a neih hma pawhin Gandhi-a chetna bik tur ruahmana amah buaipui a ni a; a tih tur tuksaktu niin heng zingah hian kumin kumtira Goa inthlana a campaign leh tuna Bharat Jodo Yatra an neih turah pawh a khaipa a ni.

Congress hruaitute chuan Byju-a hi Gandhi-a zinna tur ruahmantu mai niin an sawi a; mahse, tunah chuan thunei taka awm tawhin dawhsanah pawh a thutpui phak fo tawh a. Gandhi-a aiawha Punjab Chief Minister Captain Amarinder Singh-a hnena thu thlentu ber a ni a, captain hi a hnu lawkah  chief minister atanga paih a ni zui.

An puhnaah hian Byju chuan engmah a la sawi lo.

Team Rahul Gandhi-a langsar dang leh chu general secretary in charge of organisation (GSO) KC Venugopal a ni a. Kum 2017 khan general secretary niin Karnataka changtu a ni a, hemi kum hian Gandhi-a chu party president a ni tan a, kum 2019 atang khan tuna a nihna hi a chelh a. UPA sorkarah khan minister of state a ni tawh a. AICC-a a chanpualah hian Venugopal hi biakpawh har tak nia sawi niin hei hi mi hlunte pawhin an ngaihtheih loh chhan a ni.

Hetih lai hian kum 2020-a Gandhi-i hnena an party kalphung siam that a ngai tia lehkha thawntu hruaitu hlun mi 23, G-23 an tiha tel ve lote chuan Venugopal-a’n Gandhi nufa a thunun  nia sawi chu an pawmpui ve lo thung.

General secretary zinga Gandhi-a team-a tel dang chu Randeep Surjewala leh Ajay Maken an ni.

Azad-a’n Gandhi-a PA a tihte zingah hian Alankar Sawai a tel a, ani hi ICICI Bank executive thin niin research team hotu a ni thin a. Hun eng emaw lai khan Gandhi-a twitter account pawh enkawlin hetih lai hian mi eng emaw zat Gandhi-a hian a  unfollow a ni.

Oxford University atanga zir chhuak, Kaushal Vidyarthee chu Gandhi-a official secretary niin ni tina a hun hman tur duangtu a niu a; Sachin Rao a la awm a, a mi mal thil deuh khawihtu zinga mi a nih bakah training leh Sandesh (chanchinbu) tichhuaktu a ni bawk.

Party-a hlunte chuan Gandhi-a hi politics-a inhmang tam lote thu-ah a innghat lutuk niin an sawi thin a. Hei hian party leh ram nena inpawhna a tichhia niin an sawi thin.

Azad-a kaihhruai G23 chuan Gandhi-a team hian thu an nei lutuk tih an lo sawi thawi tawh a, Congress Working Committee-ah thleng an inrawlh niin an ngai.

“Nihna peka ruatte hi hruaitu thu awiha ‘aw’ ti thei zel an ni a, hei hi inthlana kan chak loh leh chhan a ni,” tiin G23 member leh Maharashtra chief minister hlui, Prithviraj Chavan chuan Zirtawpni khan a sawi a. “Inrawn khawma thutlukna siam kha a awm tawh lo va, hei hi pawl inthlan leh awm turah pawh kan tihnun leh a ngai a ni,” a ti.