Nizan khan Iraq khawpui Baghdad-ah Iraq security force leh Shia Islam thlawptute inkarah buaina a chhuak a, mi 15 aia tlem loin nunna an chan. Buaina hi Muqtada al-Sadr-a'n politics a basan thu a puan hnu lawka chhuak a ni a, curfew puan nghal a ni. 

Buaina a chhuah hnu lawk hian silai a puak zui a, thite hi silai muin a fuhte nia rin an ni. Security official te chuan buaina chhuahna hmunah hian rocket-propelled grenade (RPG) vawi eng emaw zat a puak tih an sawi bawk. Thite hi Muqtada al-Sadr thlawptute an ni a, mi 350 velin hliam an tuar bawk a ni. 

Buaina a chhuah hnu hian Kuwait chuan an ram mi leh sate chu fimkhur thilah Iraq chhuahsan nghal vat turin a hriattir a, UN Secretary General Antonio Guterres pawhin Baghdad-a buaina chhuak chu pawi a tih thu leh boruak muanawm a awm leh thuai theih nana hmalak a tul thu a sawi. 

Iraq interim prime minister Mustafa al-Kadhimi chuan buaina chhuak avang hian cabinet meeting chu thulh a nih thu a sawi a, tharum thawhna chu tihtawp thuai a pawimawh thu a sawi bawk. Curfew puan nghal ni mah se nunna chan an tam avang leh lungawi lo an tam avangin Baghdad-ah hian boruak a ralmuang lo hle.