Aizawl July 14, 2024 : Bairabi atanga Hortoki inkar chu rel tlan thei turin peih fel (complete) a ni tawh a, Commission of Railway Safety (CRS)-in safety certificate a pek hunah mipui hman/chuan theih tura hawn a ni ang a. Hetihlai hian Bairabi - Sairang rel kawng chu July, 2025-ah peih fel beisei a ni.

Railway Consultant Hrangtawna hnen atanga ZALEN thudawn danin Bairabi atanga Hortoki, km. 17-a thui-ah railway bungraw phurin rel a tlan reng tawh tih sawiin mipui tan erawh hawn a la ni lo.

CRS-in a him leh him lohte an enfiaha safety certificate a pek hunah mipui tana hman theih turin hawn a ni dawn a ni.

Railway thawktute chuan chhiatna thlen palh thei a nih avangin rel kawng hnaih lutukah mipuite awm hnai lo turin an ngen a, bungrua pawh hnai taka dah lo turin an ngen a. Heng bakah hian rel kawng siamna hmanruate la bo lo turin an ngen bawk.

Bairabi - Sairang rel kawng hi Broad Gauge Railway Line tur a ni dawn a. RITES-ten he rel kawng sial survey hna hi 2005 bawr khan an zo fel a. Hna hi sawrkar laipuiin kum 2008-2009 khan sanction-in a tira estimate Rs. Vbc. 2,384.34 a ni a. Hna thawh man chu revise zel niin tunah chuan he rel kawng siam zawh nan hian Rs. Vbc. 6,547 bawr vel sen ral a ngai dawn nia chhut a ni.

Bairabi Rel Station leh Sairang Rel Station inkar rel kawng thui zawng hi km. 51.38 niin lei dawh lian (major bridge) 55 leh lei dawh tenau (minor bridge) 87 lai a awm a. Lei dawh lian 55 chunga rel kawng thui zawng belhkhawm ringawt pawh hi km. 11.61-a thui/sei a ni. 

Bairabi leh Sairang inkara hian hmun 32 laiah leiverh tunnel a awm a, leiverh zawng zawng thui/sei belhkhawm pawh hi km. 12.63 a ni dawn a. Leiverh tunnel thui ber sei/thui zawng chu km 1.88 a thui a ni.