ZALEN Feb 3, 2025; Kumin 2025, July thla a zawh hman tum, Bairabi - Sairang rel kawng siam mekah hmabak a la tam niin a lang.

Tun dinhmunah rel kawng siam mekah hian Sairang/Sihhmui bulah leidawh kai ngai hautak tham tak tur hmabak a la awm a, hei bakah hian rel station tur tunah hian buatsaih mek niin, hna a la tam niin a lang bawk.

Bairabi - Sairang rel kawng hi Broad Gauge Railway Line tur a ni dawn a. RITES-ten he rel kawng sial survey hna hi 2005 bawr khan an zo fel a. Hna hi sawrkar laipuiin kum 2008-2009 khan sanction-in a tira estimate Rs. Vbc. 2,384.34 a ni a. Hna thawh man chu revise zel niin tunah chuan he rel kawng siam zawh nan hian Rs. Vbc. 6,547 bawr vel sen ral a ngai dawn nia chhut a ni.

Bairabi Rel Station leh Sairang Rel Station inkar rel kawng thui zawng hi km. 51.38 niin lei dawh lian (major bridge) 55 leh lei dawh tenau (minor bridge) 87 lai a awm a. Lei dawh lian 55 chunga rel kawng thui zawng belhkhawm ringawt pawh hi km. 11.61-a thui/sei a ni.

Bairabi leh Sairang inkara hian hmun 32 laiah leiverh tunnel a awm a, leiverh zawng zawng thui/sei belhkhawm pawh hi km. 12.63 a ni dawn a. Leiverh tunnel thui ber sei/thui zawng chu km 1.88 a thui a ni.