ZALEN June 27, 2024; Vawiin chawhma dar 11 vel khan Melbuk atanga km 3 vela hla Tiau lui, Ui lui ah balu khur a chim a, mi 3 an boral.

Melbuk atanga ZALEN thudawn danin, Ui lui an tih ah hian balu lakna khur a awm a, hnathawk pawh engemawzat an awm.

Balu la te hian feet 7 emaw vel a thuk in an lai puk a, tukthuan ei a an chawlh lai, chawhma dar 11 vel khan balu khur hi a chim a ni.

A hmunah Melbuk khaw mi pahnih an boral a, hliam tuar pahnihte damdawiin panpui an nih laiin, Myanmar raltlan pakhat, Melbuk a kar hnih vel khawsa tawh chu kawng lakah a boral ve leh a, hliam tuar pakhat zawk chu Champhai damdawiin thlenpui tawh niin, a dinhmun a ngaihtuahawm loh nia thudawn a ni.

Balu khur chim atangin ruang pahnih te lak chhuah tawh niin, police te pawhin chhiatna thlenna hmun hi thlengin thil awmdan an enfiah bawk.

Vanduaina tawk a boral te hi mipa vek niin, rawlthar, kum naupang te te vek an ni.

Vanduaina tawk a boralte

1. Laltandika (20) s/o Liankhawnang, Tahan, Myanmar, Saikhua, inhlawhfa (raltlan) a Melbuka awm
2. Lalmalsawmdawnga (16) s/o Samuela, Melbuka
3. Lalmuankima (18) s/o Lenkhupa (L), Melbuk

Hliam tuar :

Lawmsanga, Melbuk