January 9, 2022; Bangladesh Zohnahthlakte Thlavang Hauh' punkhawm buatsaihah Central YMA president R. Lalngheta'n dan hrul hretah pawh kan hnampui ramhnuaia vakvaite chhan nan penchhuah a tul tih a sawi a, MLA rualte pawh Parva thleng tur leh vawi khat tal va tlawh turin a ngen.

Vawiin a Raj Bhavan main gate bul a hun hmanna ah hian Central YMA president chuan kan hnampui mahni sahimna atana Mizoram rawn luh tumte chhan turin a taka chetchhuah a ngai tawh tih sawiin, "CM leh sawrkar kan au a, kan MP te pawhin theihtawp an chhuah, mahse sawrkar laipui a ngeng lui tlat a, chumi su tur chuan lalnu Estheri khan dan lovin a hnam chhan nan lal hma ah a ding, vawiin ah hian dan hrul hretah pawh kan hnampui ramhnuaia vakvai te chhan nan i penchhuak ve ang u hmiang tiin ka sawm duh che u a ni," a ti.

Thlamuanna zawng a an inpui an rawn panna kawnga BSF te mai ni lo a, BSF te dan kir tura lo hek thin tute pawh hriat an nih thu leh, an sim loh chuan Mizo mipuite an chet tur thu a sawi.

Mizoram an rawn luh rukna zawng zawngah BSF te an awm fai vek tawh thu te, chumi vang chuan engti zawng pawh a an rawn luh dan ngaihtuah a ngaih tawh thu te bakah, tuna kan unau vakvai mek te hi Mizoram in zalenna an suallai a MNF rammu te ei leh in lo pe a lo tuamhlawmtute an nih thu a sawi bawk. 

"India sawrkar pawh ka ngen duh, BSF te chakna hmanga kan unaute dang zello hian kan unaute thlamuang leh zalen taka an awm theihna turin lo dah zalen rawh se," ti bawkin, a lo intiam tawh ang ngeiin, Union Home Minister Amit Shah hian hnamdangte ni lo a, Mizo ngei hmangaihtute ramri a an duty theih hnan BSF Mizo Bn. min din sak mawlh rawh se," a ti bawk.

Central YMA huaihawt a vawiin a hun hman hi vice president Lalhmachhuanan kaihruaiin, MZP president leh MSU president ten thu an sawi bawk a, Central YMA assistant secretary Prof. Malsawmliana kaihhruaina in tunhnai a ramri a boral Pastor Sawmkhupa sunna hun hman a ni bawk.