June 21, 2023; Mizoram Cooperative Apex Bank, Champhai Branch-a Security duty Vanlalrinawma, kum 30 mi chu vawiin chawhma dar 11:15 khan a duty-na hmunah a inkap hlum.

Apex Bank, Champhai Branch Manager Lalbiakdika sawi danin Apex Bank-ah hian Secuirty Vanlalrinmawma leh PC Lalrinpuia-te chu vawiin khan an duty-a, Vanlalrinawma hian nidangah rilru buai leh harsatna a neih a hriat ngai loh thu leh tukinah erawh chuan nidang ang lo takin a buai deuh nia a lan thu a sawi a. 

A duty pui PC Lalrinpuia chuan Vanlalrinawma hi a thlen hnuah duty tur hian a rawn thleng a, duty-te chawlh hahdamna pindanah lutin midang nen inbia anga insawiin tihbuai a duh loh thu a sawi a, a chhuahsan hnua a va luh leh chuan Bible a lo chhiar tih sawiin a chhuahsan leh hnu min 5 velah silai puak a hriat thu a sawi.

Vanlalrinawma hian a duty-na hmunah hian ama silai Ulbun tantawi a keng thin a, a silai hmang hian a khabe-ah a inkap niin Champhai Police-te chuan an sawi a, Champhai District Hospital panpui nghal nimah se, a hliam tuar lo hian vawiin chawhnu dar 1:30 khan a boral ta a ni.