Hun eng emaw chen an buaipui hnuah, Baptist Church of Mizoram, Bawngkawn Pastor Bial Zaipawl te chuan an music video album tur an zo fel thei ta a. Tlangzarh lohna chauhin an zai ngaihthlak leh enna a dal ta a. An album hi October ni 28, 2016 zan khian an tlangzarh dawn a ni. Bawngkawn Pastor Bial Zaipawl, BCM music video album tur hi "Engkimtithei" tih a ni a. An album thar turah hian hla mawi leh tha tak tak 12 lai an khung leng a. An hla dah ho pawh a 'variety' viau mai a, thalai atanga kum lama upa deuhte tan pawha ngaihthlak theih tur a awm kim dawn hle a ni. "Engkimithei" album-a zaipawl zai quality a tha hle a, hla thlan a fuh bakah, recording leh video lam pawh a quality a sangin, mi tam takin thlarau lama hlawkna mai bakah mit leh beng a ti tlai hle tura beisei a ni. BCM Bawngkawn Pastor Bial Zaipawl hi zaipawl intihsiaknaah pawh fak an hlawh fo tawh thin a. MSACS leh DDK in an buatsaih — Red Ribbon Choir Competition 2010 — ah pathumna dinhmun an lo luah tawh a; hei mai bakah kum 2014-a Zonet leh Wolrd Vision in zaipawl intihsiak a buatsaih — Fullness of Life Concert — ah pawh choir pakhat chiah phak loin pahnihna an ni. BCM Bawngkawn Pastor Bial Zaipawl hi October ni 28, 2016 hian Area Baptist Council (ABC) inkhawmpui, BCM Chaltlang Biak Inah release theih tura ruahmanna siam a ni.