A lun vanglai taka Beijing khawpuia lei hnuai rel pahnih insu-ah mi 102 zet an ruh a tliak niin Chinese sorkar chanchinbuin a tar lang.

Mi 500 chuang damdawi inah dah luh an ni a, an insut hi Ningani tlai dar 7:00 (India-a tlai dar 4:30) velah a ni.

Relte hi vur nasa taka a tlak laiin, Changping subway line tlang awih chhuk laiah an insu a ni.

Zirtawpni tukah khan mi 423 chu damdawi in atangin chhuah leh an ni tawh.

Chinese khawpuiah hian inkalpawhna hmanruate hian tawhsual an tawk khât hle a; mahse, vur a tlak hian relkawng hi a nal zual hle thin thung.

Transport thuneitute chuan kawng a nal em avang hian ‘signal a tihbuai phah’ a, rel kal hmasa zawk hian a tihdinna a hmeh thut phah niin an sawi tih China Daily chuan a tar lang.

A hnunga zuitu rel hian vurin a bawh kawngah hian a dintir ve thut thei ta si lo va, a hmaa mi hnung lam a su ta a ni.

Rel pindan pahnih chu kawng atangin an tla hrang a, khawi zawk rel pindan nge tih erawh hriat mai a la ni lo.

Online-a thlalak leh video darhah chuan pindan thla hrangah hian mi chuang an tawt hle a, power a awm loh zui avangin a thim vek bawk a. Mi thenkhatin emergency hammer (tuboh) hmanga a tukverh an tichhe lai a lang bawk.

Chinese social media network Weibo-a video tawi an dah pakhatah chuan hmeichhe pakhat chu thutnaah nikhawhrelova a awm reng lai a lang bawk.

Mi 67 chu damdawi inah an la awm a, an zinga mi 25 chu ‘zai ngai’ an ni a. Thi erawh an awm lo.

He thil thleng hi Chinese netizen tam tak chuan an sawi zui nasa hle a. Hliam an tam em avangin mi tam tak a barakhaih a, insutna thleng chu fimkhur tawk loh vang nia sawi pawh an awm.

Pakhat chuan, “Beijing subway hi enkawltu an awm lo em ni? Endik uluk a ni em?... Mi za tel nunna an kuta awm hi an ngaizam mah mah,” tiin pakhat chuan Weibo-ah a tar lang a. Beijing Subway hi municipal sorkar ta niin khawpui chhungah subway leh rel line 27 an enkawl a ni.

Beijing Subway hian thil thleng avangin ngaihdam an dil a, hliam tuarte enkawlna zawng zawng an tum tur thu an sawi bawk.

Beijing-ah hian vur a tlak nasat avangin kawngpui, rel leh thlawhnaa zinna pawh a buai hle.

Ni lo la kal leh turah hian China hmar lamah khua a vawt zual dawn niin an sawi lawk bawk.

Khaw chin zirtute chuan Ningani atanga Pathianni thleng hian 8°C leh 12°C inkar zetin a tlahniam dawn niin an sawi a. Heti a nih chuan Beijing hi -20°C zeta vawt a ni dawn tihna a ni.

Khawpui dang thenkhatah pawh thuneituten sikul an khar a, rel dintir a ni bawk.