Belgium chhim lama mipui zinga car khalh luhin mi pawng sutnaah mi paruk vel an thi.

Khawpui ber, Brussels atanga chhim lam km 50 vela hla, Strépy-Bracquegnies khaw tereuh tê-a thleng a ni.

Car hi chak taka tlanin Pathiannia carnival parade-a inlan tuma insingsa mek mi 60 vel awm khawm chu a su ta a ni.

Hliam tuar zinga thenkhat chu an na hle a, an dinhmun pawh a ngaihtuahawm hle niin police thupuangtu chuan BBC a hrilh.

Hetiang beihna a thlen chhan hi chhui zui nghal mek a ni a; mahse, police chuan mi firfiakte chetna erawh a nih loh thu an sawi.

“Chetsualna (accident) pangngai a ni a, a pawi tak zet a ni. Car hian lo awm khawmte hi a su a, tlan tlang zui a tum a; mahse, police-in an tiding nghal a ni,” tiin police thupuangtunu, Cristina Ianoco chuan a sawi.

“A khalhtu leh chuang ve dangte chu man nghal an ni,” a ti bawk.

Police hian Belgian chanchinbu thenkhatin a sutu car hi police-in an umzui hnuah chauh an man nia an tar lan chu a dik loh thu an sawi.

Belgian Interior Minister Annelies Verlinden chuan, “Tukin thil thlenga a tuartu chhungkua leh an thiante ka tawrhpui tak zet a ni,” tiin Twitter-ah a tar lang.

“Party hlimawm leh ropui tak tura ngaih chu lungngaihnaah a chang ta a ni,” a ti a. “Thil thleng hi ngun taka en zui mek zel a ni,” a ti bawk.