Bengal by-election

Admin - Sep 05, 2021

Bhabanipur bialah CM Bannerjee-in chuh dawn

bYE-eLECTION zINKAWNG : Banerjee-i kaihhruai Trinamool hian April-May inthlanah khan bial 294 awmah bial 213 zet an la a; mahse, amah ber hi a tling zo lo thung.

Chief minister hian Nandigram-ah chuhin a thachhangdawltu thin, BJP-a kal ta, Suvendu Adhikari chuan vote 2,000 pawh tling lovin a hneh a, Culcutta High Court-ah a thlen hial.

Adhikari-a hian lian tak takin dan a bawhchhia niin a puh a, ei rukna thil a ti a, sakhaw behchhan hmangin vote a zawng a, booth a thunun (capture) niin a puh a. Election commission-in vote chhiar that a dil an phalsak lo chu a hre thiam lo bawk.

May thlaa inthlan result a chhuah hnu lawkah Trinamool chuan Bhabanipur bial atanga an MLA tling thar, Chattopadhyay chu bângin Banerjee-i a din theih nan a kian tih a sawi.

Banerjee-i hi chief minister a ni tho va; mahse, ni zui zel turin thla ruk hnuah inthlanah chaka MLA a nih a ngai a. Chattopadhyay-a pawh agriculture minister niin amah ang bawkin MLA-a tlin zui ve ngai a ni a, an hun neih hi November-ah a tawp dawn a ni.

Bengal-a Bhabanipur assembly bialah chuan September 30-a by-election neih tur a nih thu Election Commission chuan Inrinni khan a puang a. He bial hi Mamata Banerjee chuan a chuh dawn a, chief minister ni zui turin a chak ngei a ngai dawn bawk.

October 3-ah vote tlate chhiar a ni dawn a. He bial rual hian Bengal  thova Samserganj leh Jangipur bialah inthlan a ni ang a, Odisha-a Pipli bialah vote thlak a ni bawk ang.

Hetih lai hian by-election neih tulna bial dang 31 - Maharashtra, Telangana leh hmarchhak state thenkhata mite chu Covid-19 leng mek avangin sawn hlat rih a ni.

“Danpuiin a phut ang leh West Bengal state-in a ngen angin, AC 159 - Bhabanipur inthlan neih a ni dawn a. Covid-19 laka mite an himna turin commission chuan khauh takin dan a zam dawn a ni,” an ti.

“Chief secretary leh chief electoral officer-te nena inrawn a nih hnuah assembly bial 31 leh parliament bial thuma inthlan ngai erawh sawn hlat a ni,” tiin commission chuan a sawi.

Bengal leh inthlan hmabak state eng emaw zatah chuan kumin kum tir lama inthlan campaign ngawrh lai khan hri leng a darh nasa hle a. Bengal-ah hian May thla laihawlah kha chuan ni tin hri kai mi 20,000 chuang an awm hman.

Tunah erawh chuan ni sarih liam ta chhunga ni tina kai hmuh hi 640 hnuai a ni tawh.

Bengal sorkar chuan by-election hi neih theih a nih thu leh hripui chu thunun a nih thu an sawi a. June thla khan Banerjee-i hian Prime Minister Narendra Modi chu by-election chungchangah na taka beiin, “Prime minister-in thu a pek hunah election commission chu a che mai ang,” a ti.

An state sorkarin by-election neih tur a hmanhmawh chung chungchangah hian BJP chuan an bei na hle a. Thla hmasa khan state BJP chief Dilip Ghosh chuan Banerjee-i chu engvanga hmanhmawh em em nge a nih a zawt.

Bannerjee hi inthlanah khan a chak lo va, heti chung hian chief minister a ni a. Bhabanipur bial atanga thlan tlin, Shobhandeb Chattopadhyay chuan a bial hi kianin a bâng a, heti chung hian agricultute minister a ni tho va. Ani pawh hi Khardah bialah a chuh zui ve tho rin a ni a, he bial hi coronavirus avanga Trinamool Congress MLA, Kajal Sinha a thih avanga ruak a ni.

Share now