Bengaluru-a mi mal sikul 44 chuan Zirtawpni tukah khan email hmangin bomb-a vauna an dawng niin police-in an sawi a. Email-ah hian puak thei hi sikul hung chhungah a awm niin an sawi.

Police kal nghalin sikulah hian thil rinhlelhawm a awm em tih an en kual a. Bomb sut thiam (disposal squad) pawh heng sikulah hian dah nghal an ni a. Sikul zingah hian Whitefield, Koremangala, Basveshnagar, Yalahanka leh Sadashivanagar te pawh a tel.

Zirlaite leh thawktute hi sikul atanga chhuahtir nghal vek an ni a, thil rinhlelhawm hmuh pawh an nei chuang lo niin police-in an sawi.

“Email lo kalna hi kan chhui zui mek a. Kan ngai thutak hle a, police hnenah pawh ngai pawimawh hle turin ka ti,” tiin Karnataka Home Minister G Parmeshwar chuan a sawi. 

Bengaluru Police Commissioner B Dyanand chuan, “Intihderna thil pawh ni mah sele police chuan a mawhphurtute chhui chhuah ngei kan tum a ni,” tiin X-ah a tar lang.

Bomb hmanga vauna an dawn hnuah sikul pakhat chuan nu leh pate hnenah inkaihhruaina an tichhuak nghal. 

“Sikulin vawiin khan beisei loh tak thil kan tawng a. Hriat loh atangin himna lamah vauna kan dawng a, kan naute himna kan ngai pawimawh ber a, naupangte chu haw darh nghal vek tura tih an ni,” tiin an chhuah. 

Karnataka Chief Minister Siddaramaiah pawhin nu leh pate hnenah, “Inralrin vek a ni a, nu leh pate tan chiaina tur a awm lo,” a ti.

“Police-in an chhui dawn a, chhui turin ka ti bawk a. Venhimna khauh taka siam a ni a, nu leh pa tan chiaina tur a awm lo va. Police-te chu sikul endika venhimna pe tha turin ka ti a. Police department hnen atangin preliminary report pawh dawn a ni,” tiin a sawi.

Sikul vau zinga pakhat chu Karnataka Deputy Chief Minister DK Shivakumar-a chenna in bul lawka mi a ni. 

“TV chanchin thar atangin sikul thenkhat, ka hriat chian ve leh kan in bula mi ngei pawh vau an ni tih ka lo hria a. Police-in mail an dawn pawh ka en ve nghal a, intihderna niin ka ngai a. Police ka bia a, an chhui zui nghal mek a. Kan inring a, lungngaihna tur a awm lo va. Nu leh pa pawhin an buaipui hle a; mahse, police kutah a awm tawh a ni,” tiin Shivakumar chuan a sawi. 

“Tute emaw thil tih a ni a, darkar 24 chhungin kan man dawn a. Cybercrime police-in ngawrh takin an chhui a ni,” a ti bawk.

City Police Commissioner B Dayananda chuan, “A hma pawhin lehkha leh email hmangin sikul vauna hi dawn tawh thin a ni a; mahse, intihderna niin police-in a titute an man a. Police hian vawiina mi pawh kan en zui mek a, mipuite tan lungngaihna tur a awm lo va, intihderna ni ngeiin a lang,” a ti.

Nikum khan Bengaluru-a sikul pasarih tuna mi ang bawk hian tihthaihna an dawng tawh a, a lem a lo nih thu police hian an sawi bawk.