BJP chuan heartland state an tiha OBC an chen tam lohna ber, Madhya Pradesh-ah an chief minister atan kum 58 mi, Mohan Yadav an ruat ta a, amah OBC a nih avang leh rinhlawh tak tak mi dang an tam avangin mak tih a hlawh hle.

Yadav-a hi BJP legislative party chuan an hruaitu atan Thawhtanni khan an thlang a. Chawlhkar khat chuang liam taa Madhya Pradesh-a Congress an hneh hnuah chief minister tur an tichiang thei ta a ni.

Sorkar liam taa higher education minister, Yadav-a hian BJP-in chanvo thar an pekah lawm thu a sawi a. “Party worker tenau tak ka ni a, party-in hetiang remchang min pe hi ka lawm a ni,” a ti.

BJP hian kum 2024 Lok Sabha inthlanpui thlir chungin chief minister hi an ruat a, deputy chief minister atan pahnih - Jagdish Devda leh Rajesh Shukla an ruat bawk.

Devda hi Malhagarh bialah vote 60,000 chuanga hnehna changin Shukla hi Rewa bialah a vawi nga nan vote 21,000 velin a chak thung.

Devda leh Shukla te hi Chouhan-a sorkarah khan cabinet minister an lo ni tawh.

December 3-a state pathuma hnehna an chan hnuah state pahniha chief minister tur an tifel ta a. Vishnu Deo Sai chu Pathianni khan Chhattisgarh chief minister turin tihfel a ni bawk.

November thlaa state panga inthlang zingah Rajasthan chiah chief minister tur la chiang lo an ni ta a. Telengana-ah Congress chuan Revanth Reddy chu chanvo sang ber chelh turin an tifel tawh a. Mizoramah Zoram People’s Movement chuan hnehna changin Lalduhoma chu chief minister atan lak luh a ni tawh.

Ujjain district atanga vawi thum lai thlan tlin tawh, Yadav-a hian kum tam tak Shivraj Singh Chouhan-a’n politics kawng a lo zawh tawh chu a titawp dawn ta a ni.

Chouhan-a hi vawi li lai chief minister ni tawhin BJP-in an state-a hruaitu an neih len ber a ni a; mahse, November 17-a vote an thlak hma atang tawh khan thlak duhna a awm tawh a. An campaign lai pawh khan Prime Minister Narendra Modi-a chu vawrh lar zawkin ‘a huhova inhruaina’ chu an zuar deuh ber zawk a ni.

BJP hian inthlanah khan bial 230-ah 163 an la a. Kum 2018 inthlanah khan Congress-in hnehna an chang a; mahse, kum hnih hnuah an sorkar tluin MLA 114 an neih atangin 66-ah an tla.

Tun tumah hian chief minister tur zingah union agriculture minister hlui ni ta, Narendra Singh Tomar chu rinkai zingah a tel a; mahse, assembly speaker a ni dawn ta a. Tomar-a hi farm law duh lohna nasa taka lantir a nih lai khan hneh taka a ministry a hruai avangin Chouhan-a thlaktu tur hian a rinawm hman hle a ni.