Madhya Pradesh, Chhattisgarh leh Rajasthan inthlana result a chhuah hnu ni nga a liam hnuah pawh hnehna chang, BJP chuan an chief minister turte an la tifel lo va, a ngaihtuahpui turin Zirtawpni khan central observer a ruat.

State pathuma MLA thar thate hi an thutkhawmpui ang a, an hruaitu tur thlanpuiin kartawp chhung hian chief minister hi tihfel hman an tum.

Madhya Pradesh-a obeserver turin party chuan Haryana Chief Minister Manohar Lal Khattar, K Laxman leh Asha Lakra a ruat a. Chhattisgarh-ah Union Minister pathum - Arjun Munda, Sarbananda Sonowal leh Dushyant Gautam te ruat an ni.

BJP hruaitu pakhat chuan observer-te hi an chanpual theuh state-ah hian zinin MLA thlan tharte hi an thutkhawmpui ang a, chief minister tur an thlanpui dawn niin PTI a hrilh.

Chief minister tur hi tumah a hminghmerha la tum lawk an awm lo va. Vantlang, ram bial bil, sorkar leh an party ngaihtuah chungin an thlang dawn niin a sawi.

BJP hian Rajasthan leh Chhattisgarh-ah Congress paih thlain Madhya Pradesh-ah chiang takin hnehna an chang nawn thung a. Saffron party hian Hindi heartland-ah an len phah ta hle a, Prime Minister Narendra Modi-a tan pawh 2024 Lok Sabha inthlana hnehna chan nawn leh theihna remchang a siamsak nia ngaih a ni.

Chhattisgarh-a bial 90 awmah BJP hian bial 54 an la a, Congress-in 35 an la a. Rajasthan-ah bial 199-ah 115 zet lain Madhya Pradesh-ah hian bial 230-ah 163 an la bawk a. Hetih lai hian BJP hian Telengana-ah bial 119 awmah bial riat chiah an la a, K Chandrasekhar Rao-a kaihhruai Bharat Rashtra Samithi (BRS) an paih thla a. Revanth Reddy chu Ningani khan chief minister atan lak luh a ni tawh.

Pathiannia result a chhuah hnuah state pathumah party hruaitu lawkte an thukhawm fo tawh a, an zingah hian Union Home Minister Amit Shah leh party president J P Nadda pawh an tel a. Hetih lai hian party chuan inpawhna a awm nia sawi chu a nih loh thu leh tih dan pangngaia thukhawm an nih thu an sawi thung.

Ningani tukah khan Rajasthan chief minister hlui leh a ni leh tura rinkai ber pakhat, Vasundhara Raje-i chuan Delhi a thleng a. "Delhi-ah hian ka mo hmu turin ka kal mek zawk a ni," tiin thlawhna tumhmuna thuthar lakhawmtute a kawmnaah a sawi.

Madhya Pradesh-ah Narendra Singh Tomar-a chuan Ningani khan union minister atanga a bânna a thehlut a. Rajasthan atangin Baba Balaknath chuan Ninganiah Shah hi a hmu bawk a. An pahnih hian Lok Sabha member an nihna an bânsan tawh.

Madhya Pradesh-ah hian Other Backward Classes-a mi, Tomar leh Union Minister Prahlad Singh Patel te chu chief minister tura rinkai an ni a, Shivraj Singh Chouhan-a hming pawh a ri leh mek.

Chhattisgarh-ah OBC hruaitu, BJP President Arun Sao te, Scheduled Tribe-a mi ve ve, Union Minister Gomati Sai leh Lata Usendi te chu chanvo sang ber chelhtu tura rinkai an ni.