ZALEN April 4, 2025 : BJP Friday Political Session-a thusawitu Dr. K. Beichhua, MLA chuan Kalphung thar sawrkarin mipui Healthcare tia April 1, 2025 atanga a kalpui hi Healthcare vanduaithlak tak a ni a, buaina namen lo sawrkar leh mipuiin an tawh ngei a rin thu a sawi.

Dr. K. Beichhua chuan, "Government servant hian facility an neih zinga Security an neihna bera an ngaih chu medical reimbursement an neih hi a ni a, Medical Attendant Rule ah he hamthatna hi tun thlengin sawiselna leh lungawilohna engmah awm lovin lawm takin an la enjoy mek a. Chutihlaiin tun sawrkarin Mizoram Universal Health-care Scheme-a sawrkar hnathawkte barluih an ni hi a vanduaithlak a. Hei hi sawrkar hian a rang lama chinfelsak turin ka ngen duh a ni," a ti.

"Hospital empanelment chungchangah ka hriat danin State pawn lama Hospital Empanelled hi 20 an ni a, chung ho pawh chu deemed Empanelled an ni chauh a, MoU sign pui pakhatmah an awm lo. State chhungah Private Hospital tam tak zingah damdawiin pa 6 chauhin an pawm a, Private Hospital Association te'n an pawm lo thung a ni," a ti bawk.

Dr Beichhua chuan sawi chhunzawmin, "MLA-te pawh Medical Reimbursement ti thei kan ni sa a, tunah hian he scheme hnuaia thun luh tum mek kan ni a, hei hi kan duh dawn nge dawn lo tih hi ngun taka kan ngaihtuah a tûlin ka hria a ni. Tun hnaia Assembly Budget Session neih zawh takah khan Health & Family Welfare Demand Discussion ah khan ka lo sawi tawh," a ti.

BJP State Core Group member chuan, "Tuna Mizoram Sawrkarin Mizoram Universal HealthCare Scheme an tihah hian AB-PMJAY hi a laimu ah dahin fuh ti takin a kawr rawng dangin an chei mai mai tih a hlauhawm hle, kan lo en ang ka lo tih tawh ang khan, tunah hian Mizoram mipuite chuan kan enchhin tan leh mek ta a ni. Thla hnih-khat hun an kal ang a, AB-PMJAY kawra rawng dang kan lo hnawih Health-care Scheme hi a nihna dik tak a lo lang tawh ang a, Sawrkar pawh hian tifuh an intih kher ka ring lovin, buaina namen lo kan tawh ngei ka ring a ni."

"Chuvangin sawrkar hnathawkte, Private Hospital neitute nen mumal taka sawi hovin harsatna kan tawh hma hian ennawn leh ngei turin ka phut tlat a ni. Chuvangin Mizoram mipui aiawha thlan tlin kan nih angin, mipui thatna turah chuan inphahhniam a tul hnunah inphahhniamin, thuneitu zawk kan nih vanga harsatna cho chhuak kher lovin, Stakeholders te nen Dawhkan khat kila mipui tan remna kan zawn a tul a ni," a ti bawk.