India rama Hindu sakhaw zuitu mi maktaduai tel chuan Zirtawpni khan an kût ropui ber pakhat, Holi (rawng kûtpui) chu uar takin an hmang a, Bollywood star te pawhin hlim takin hun an hmang. Bollywood superstar Katrina Kaif leh Vicky Kaushal te chuan an inneih hnua a vawi khat nan Holi an hmang dun a, chhungkuain an hlim hle tih an thlalak atangin a lang thei.
 
Amitabh Bachchan leh a nupui Jaya Bachchan te pawhin Holi hi hmangaihna inlan tir tawnna hun atan an hmang a, Taapsee Pannu leh Diana Penty te pawh social media lamah an festival hmang lai thlalak post uar zingah an tel.

Nick Jonas pawh a awm mai mai bik lo. American ni mah se a nupui Pryanka Chopra chu Indian a nih miau avangin, makpa tan pute tih lawmna hun remchangah hman mai a fin thlak tih a hai lo. Nick hian a rawng ken chu Pryanka a theh vel a, naupangte nen hun nuam tak an hmang a ni. 

Nick leh Pryanka te hian an chenna Los Angeles-ah Festival of Colours hi an hmang a, rawngin an inchei rang nasa hle. An video leh thlalak hrang hrangte chu social media lamah hmuh tur a awm nual.