ZALEN December 14, 2025: Kristiante hunpui lo thleng tur Krismas leh kumthar vuakvetah Aizawla buaina leh harsatna thleng a awm loh nan police-ten nasa taka hmalak an tum.

ZALEN-in Aizawl district Superintendent of Police, Zosangliana, IPS a kawmnaah hunpui vuakvetah hian a tam thei ang ber police duty an tum tih a sawi a. “Aizawl North SDPO leh Aizawl South SDPO kaihhruaina hnuaiah Aizawl khawpui hi hmun (zone) liah thenin zone tinah hian DSP rank kaihhruainain December 22, 2025 atanga January 4, 2026 inkarah nileng leh zankhuain khawpui vil a ni dawn a. Hei bakah quick response team siamin buaina chhuak emaw, tanpui ngai an awm palha che chhuak mai thei turin an inring reng dawn a. Aizawl Police Station-ah control room dahin 24x7 duty a ni dawn a ni,” a ti.

Mipui nunauten ralmuang taka hunpui an hman theih nan khawpui chhunga police station paliten patrolling an nei dawn tih sawi bawkin SP chuan, “Tunlai hian heng police station palite hi zan dar 7 atanga zing dar 4 inkar chhungin patrolling an nei thin a. Mahse, December 22, 2025 atang chuan chhun zan zawmin patrolling hi an nei dawn a. Hei bakah hmun pawimawh leh lun lai deuhah police duty dah tum a ni,” tiin khawlaia drugs addict an tlem zawk nan prison van nen nasa zawka duty an tum bawk tih a sawi.

Halpuah leh halmawi chungchang zawhna chhangin Aizawl SP chuan, “November thla atang khan a khat tawkin halpuah leh halmawi check hna hi kan kalpui reng a, kumin bikah hian tum khat chiah man kan la nei a. Kan check tam ngaihtuahin man tur a tlem hi lawmawm kan ti a, krismas dawn hnaiah YMA nen tang tlangin halpuah leh halmawi check runpui hi neih leh kan tum a ni,” a ti bawk.

Hunpui vuakveta duty tur hian Police battalion hrang hrang atangin sipai engemaw zat pawhkhawm tum a ni.