ZALEN March 31, 2025 : Central YMA, Aizawl Municipal Corporation leh UD&PA Department te thawhhona-a Aizawl khawpui “Faina Hnatlangpui” chu vawiin khan UD&PA Minister K. Sapdanga chuan Sikulpuikawn-ah a hawng. He thawhhona hnuaiah hian Branch YMA ten kum khat chhung fai tura inelna hi an kalpui dawn a ni.

Minister hian hian YMA Branch Fai Inelna 2025 a khuhhawng bawk a, CYMA hruaitute hnenah bawlhhlawh bawm lian 300 a hlan nghal a ni.

CYMA, UD&PA leh AMC te tangkawp chuan kum 2025 – 26 chhung atan Aizawl khawpui faina kawnga chak zawka hmalak a nih theih nan thawhhona thuthlung an siam a. Chumi hnuaia hmachhawp hrang hrang te zingah Faina Hnatlangpui hi a hmahruaina a ni a. Thawhdunna kal zela YMA Branch Fai Inelna neih turah hian branch hrang hrangte kum khat chhung an inel dawn a ni.

Minister K. Sapdanga chuan fai tura hmalakna pawimawh tak pakhat ‘Comprehensive Plan For Municipal Waste Management in Aizawl’ a nih thu sawiin, 4.7.2024 khan UD&PA, AMC leh Aizawl Smart City Ltd. hotu ten lungrual taka pawm tlangin hming an sign hnan a. He Comprehensive plan ah hian Aizawl Khawpui faina tura ruahmanna leh hmachhawp tarlan ni in, hmalakna tura mawhphur tur awm te pawh tarlan tel zel a ni. Heng ruahmanna te tihlawhtling tur hian UD&PA Secretary kaihhruaina in Monitoring Committee siam a ni a. Anni hian chak takin hma an la chhunzawm reng a, vawina hnatlangpui neih theihna pawh hi he committee leh CYMA te inbiakremna rah a nih thu a sawi.

Minister chuan, 'Common Biomedical Waste Treatment Facility' Tuirial-a mi chu Aizawl Smart City Ltd. in a sak hna a zawh tawh thu leh thla thar April ni 1 atang hian a takin hna a thawk tan tawh tur thu a sawi a. Mizoram a la awm ngai lo a ni a, tunah chuan Biomedical Waste Management Rules 2016 in a phut ang ngeia damdawi in leh a kaihnawih bawlhhlawh sawngbawl thei tur chu phurawm a ti.

K. Sapdanga chuan Bawlhhlawh tawihtheilo sawngbawlna tur bik “75 Ton per Day Material Recovery Facility ( MRF)” chu Aizawl Smart City Ltd. in Industrial Growth Centre, Luangmual ah a siam mek thu sawiin Company thiam leh experience nei tha tak rawih a nih thu leh he project atan hian Aizawl Smart City Ltd, AMC leh Contractor ten inremna thuthlung ziak in, chu inremna ang chuan contractor hian a siam hna a thawh zawh ah kum 10 chhung he project hi a enkawl chhunzawm dawn a ni a ti.